خان جغان - khanghan
جميع المقالات

الو .. الو .. الو .. منو عمي راهي ؟ آني صاحب ابن حجي خلیل . اي اي .. بلچي من یمک اتدز علی رضیه اتگوللها صاحب یم التلیفون .؟
_ منو طلعلک ؟
_ عمي راهي ابو التکان ؛شوف اشلون عرفني؟ بس گلت له صاحب ابن حجي خلیل رأساً عرفني .؟!!
_ چان اتگول له احنا بالولایه ابغداد .ویایه مزعل وجعان بالخستخانه ؟ 
_ اي لحظه هاي رضیه یمچن أجت . الو .الو ..الو منو رضیة ؟
_ ألمن راید ؟
_ رضیة مرت مزعل .؟
_ اشبیه مزعل داده ؟
_ مابي شي . منو إنتي رضیة ؟
_ _ أنت منو ؟
_ آني صاحب ابن حجي خلیل .
_ واشبیه مزعل ؟
_ ودیته للخستخانه المجیدیة والدختور گال شارب ماي خابط یمچن .
_ وهسه اشلونه ؟ بعده وجعان ؟ 
_ طلعوه من الخستخانة وهسه دنفتر بالولایة . وچ رضیة لو اتشوفین الولایة اشکبرها ؟ اتضیعین بیها .
_ بعده وچه اصفر یصاحب ؟
_ فد اشویه اودیه اوکله معلاک ؛ الدختور گال المعلاک زین یروح منه الصفار .
_ صاحب انطیني ایاه اشوف اشلونه .؟
_ اي بس لاتسولفین هوایه ویاه . الدختور کال خلي یشرب ماي من البوري .
_ أي یا بعد روحي . انطیني ایاه .؟




_ هاک ویاک مرتک .
_ الو .. الو ..الو .. اشلونها امي رضیة ؟ اشلونهم الویلاد ؟ آگول الطلیان منو اخذهم للبستان ؟ .. 
- امک زینة وماگدرت تجي یم راهي ؛ تقرالک یومیه قرعان بلکت وچک ایروح منه الصفار .
_ الدختور گللي اشویه فرفح عن روحک وافتر ویا صاحب بالولایه .
_ وین اتنامون ؟ مزعل ؟
_ ابیت گیطان السایق وبعد چم یوم ارجع لبهرز .اگوللچ اشتریت لچ رسمه ؟ 
_ رسمتیش ؟
_ بغداد کلشي بیها . رسمه حلوه گلت اخلیها بالبیت ؛ وشوفي النسوان هنا  واللیل کلها مخبوصة الناس بالجاده مدري شیدورون ؟
_ ابیوتهم مثلنا طین وتبن ؟
_ وچ یا طین یاتبن ؟ اوتیلات بالجاده وشیلمان ابیوتهم وماکو بگ وحرمس .
_ الرسمه مالتیش ؟ عفیه دگوللي ؟
_ رسمه مچرچبه راح الفها بالگونیه واجیبها ویاي . بس اگوللچ ؟ مو تسولفین للمختار لو لراهي ؟
_ لویش ؟
_ جیبي اذانچ وخلي محد یسمعچ .
_ هاي خلیت التلیفون جوا الفوطه . گول ؟
_ الرسمه بیها وحده حلوه .اشویه امبین منها وجهها .
_ متزوجه ؟
_ مدري منین ؛ بس امبینة خوش ابنیه . کلما اباوع علیها تضحک بالچرچوبه ....
طوط ..طوط ..طوط ..طوط 
انگطع الاتصال ویا بهرز .
...........
 الی ان یعود الاتصال مع بهرز مساء الخیر وافطاراً شهیاً ..











































Reacties


عدنا بالعراق اكثر من خمسين قناة تلفزيونية واغلبها تقدم برامج سياسية تافهة وتحريضية وماشفت قناة تقدم مثلا ساعتين برنامج عن المقام البغدادي لو العراقي او برنامج تراثي شعبي عن محلاتنا القديمة ودرابينها ودكاكينها ويكون التصوير على ايدي فنانيين ماهرين بالتصوير السينماىي . 

 

 كنت احلم فرد يوم اقدم برنامج عن محلاتنا هذه والعادات والعربنجي وعركات المطيرجيه واشلون حجي علي اشترى سيارة جديده شوفر موديل 1940 وخلانا نكعد بيها ونتفرج عليها واشلون ام عليه بالسطح احترك فوطتها من ورا كمزة الدجاجات وهي كاعدة تخبز واشكد لمينا جكليت من اشتروا بيت عارف راديون جديد وام عارف خيطت قماش لفوك الراديون حتى لاتشوفها كريمة وتضربها ابعين وتحترك اللمبه مالت الراديون وعلويش سيد كاظم متعصب اباب التكان من انجب الدبس وكال كلها من وراج ولج عبايتج جرت تنكة الدبس واشلون خالة نجيبة ما قبلت اتزوج زينب بنتها لعدنان الاشكر وعلويش الانكليز ما يشترون كيمر من المعيديات بس يحبون يتفرجون عليهن وحماده امخيل على تسواهن ام البن اشكد حلوه جانت . وشلون جنا نضحك على البنات اشكد خوافات من شافن الجرديدي طفر من دبة الطرشي وصياحهن ابنص الحوش واحنا منخاف غير بس من الطنطل ابو مره وعلمود هايه جنا انشيل ابره ويانا بالدشداشه حتى انجك الطنطل ويموت ونخاف نفوت من جوا الطاك بالليل . وحميد الشرطي من يمشي بالدربونه عبالك طب وزير الداخليه الكل توكف لعب الطوبه الى ان يفوت بيده عوده . والمختار ماقبل تكعد ميادة بالمحله وكال منعرفها امنين ما امنين بس جانت حلوه تخبل وتغمزلنا بطرف العين والمختار اشمدريني ليش ميقبل تكعد بدربونتنا . اشبيها اتخبل . وام فريد من تمشي ابو فريد ايكول من صدقى لله على مرتي اشلون تمشي وهي تضحك بصوت ناصي وحبينا نحلم على صوت ام فريد الحلوه . وبعد وبعد وبعد عن سنوات العشرينات والثلاثينات والاربعينات والخميسنات والستينات .... 


واسولفلكم عن كل الايام واقدم الاهالي بالتلفزيون بملابسهم الجراويه والزبون والفينه والعرقجين والكلاو والعبايات ..... 



Reacties

سنصلح کل ماتکسر ... 
 بیتنا وبغدادنا و بلدنا سیکون اجمل بهمة الشرفاء الذین یعشقون ترابه وسماءه وماءه .. الوطنیه لیست دروس بالکتب . بل همة ان ننظف شوارعنا ونتعاون مع البلدیة ونزبل ( الوایرات ) العشوائیه ولانرمي الاشیاء الثقیله بالمجاري ونسمح لسیارات الاسعاف بالمرور ربما ابي او اخي او اخیک ینقل للمستشفی ولانتعاون علی اعطاء الرشاوي للذین لایؤدون واجباتهم بصدق ونتعاون مع المعلمین باعطاء الدروس لاولادنا ونصبغ ونلون من جدید حیطان درابیننا ونرفع صور ( الطناطل المسؤولین ) من الحیطان ونضع  بدلا عنها صور الزهور ولانتجاوز  علی ارصفة الناس فهي لمسیر اختک وامک وبنتک لندعها تسیر براحتها دون تضییق


. ولنفتخر بمطربینا الذین زرعوا لنا بسمة الحب والغزل باغانیهم وللشعراء نقبل اهاتهم ونخفف من صوت الجوامع الذين اضروا طیلة الاعوام التي مضت ونبتهج لمهرجانات الفرح ببابل والمتحف البغدادي وام الربیعین وشقلاوه ونحيي حفلات شط العرب وجزیره الاعراس وصدر القناة ولنتوقف عن لبس ( النعال والدشداشه والبیجاما ) بالشوارع العامه فهي لیست مظاهر بغدادیه للاسف ولنعود الی لبس القاط والسموکن والتنانیر والمیني جوب ویعود الشباب والشابات للمسابح ورکوب الدراجات کما کانت سابقاً بایام الجمعه بسلمان باک .. 



التحضر یبدآ من العفو عند المقدره وترک القانون بید الدوله لکي یحاسب المسيئ والقاتل .وعدم ترکها  بید العشائر والافراد ومظاهر السلاح فهي تضر بالبلد .. 
فکلنا مقصرون وکلنا حطمنا شبابیک بیوتنا وحطمنا  مستقبل اولادنا فلنبدآ من جدید لنترک ( الانا ) والانانیه ونصبح من جدید بلد یحبه الجمیع ونحبه جمیعاً ...
 مساء الخیر لکم .





Reacties

بغدادیات .. ( للوفاء عنوان سلمی و روزه ) وهدیتها صراع من اجل رجل ... فاضل شناشیل ..( الجزء الاخیر ) 
 حاولت روزه ان تبقي علی علاقتها بفائز ولکن دون ان تجرح شعوره بالانسحاب التدریجي . کان یتصل بها فائز بالبیت فترد علی اتصالاته بین یوم وآخر ثم بین یومین وثالث حتی اصبحت ترد علیه مرة بالاسبوع وهو یرجوا لقاءها وتتحجج ببعض الحجج التي تختلقها یبدوا ان عمها بباریس کان قد اوضح لها کیفیة الانسحاب التدریجي کما فعلها نابلیون . وهي تطبق هذه الخطة .
 قال لها سآتي للبیت من اجل ملاقاتک ؟ ردت علیه اترید ان یعلم الجیران بموضوعنا ؟ آم انک ترید فضحي بالمنطقه ؟
 حقیقة هي لم تکن تخاف احداً فهي کما تقول ام کلثوم واثق الخطوه یمشي ملکاً . ولکنها عرفت نقطة ضعف فائز هو طیبته الزائده ویصدق کل کلمة منها . وبینما هو یعیش حالات القلق ومن ثم یهدئ عندما یتصل بروزه التي تبتسم له بالتلفون ؛ اما اللقاءات کانت تقل بینهما . 
 سلمی هي الاخری تعیش حالات القلق من ان لایتمسک زوجها مره ثانیة بروزه . صحیح انه یقضي بعض النهار بالبیت معها ولربما یذهب للمقهي القریب فترسل بعض الاطفال لیراقبوه ان کان بالمقهي ام لا . وفائز یحس بعیون هؤلاء الاطفال الجواسیس الصغار . لکنه بین فترة واخری یوبخ زوجته من ان لاتتصرف هکذا فهذا تصرف صبیاني .
_ مو بیدي ؟ ما اگدر .
_ عیب هالحرکات . گتلچ المریه ابتعدت وهي اصلا متریدني اشوفها ؟
_ احساسي ایگول غیر شکل .
_ وتالیها ویا احساسچ ؟
_ گللک مو بیدي ؟ 
_ حیره یاربي .. بعد کل اللي سویتیه بعدچ ما ناسیه .؟ 
 في یوم من الایام زار خلف السائق بیت سلمی واشار علیه ان یکون سائقاً وربما یحصل علی اجر جید عند احد الاصدقاء ، ذهب فائز مع خلف لبیت احد الوجهاء فعرض علیه ان یکون سائقاً لدیهم متی ما یتصلون به یحضر فوراً .
_ اشلونک بالسیاقه ؟
_ اعرف اسوق .
 _ شوف حچالي عنک خلف وکال فائز ابن حلال ویومیته متکفي یم مرعي ابو الجبن وتکدر تشتغل یمه براحتک بس من نخابر علیک تگدر تجینا اتوصلنا حسب مشاورینا ؛ یدري خلف نوبات اروح للبستان بالکراده ونوبات ازور اهلي بالکریعات ونوبات ماعندي وکت احد ایوصل البنات للثانویه فاحتار . مو قصدي کل یوم اتوصل البنات للمدرسه ؟ لا بس من ما یجیهن عباس ابن خالتهم . وتگدر اتخلي تلفون بیتکم لو تلفون مرعي ابو الجبن یم خلف وخلف بعدین ینطیني ایاه . هاي مو مشکله بس عندي اهم شي الالتزام . بصراحه گبلک جان اکو واحد اشویه مخربط بالمواعید یتاخر فالحجیه کالت منریده خلي ایولي وطلعناه من الشغل . ..
_ اي وکت حبیت اتخابر اني بالخدمه . حجي ؟
 _ شغلتک مو مثل شغلة خلف . لان خلف یبقی یم ست روزه اشوکت ماتطلع لو اتروح بمشوار . بس انت تگدر تروح لبیتکم لو اتخلي السیاره یمک بالرشید ومن اخابر علیک تطلب اجازه فد ساعه من الاوسطه مالتک وتجینا .. واذا حبیت تشتغل علی باب الله هماتین مو مشکله ورا ما تخلص من یم الاوسطه مرعي .. 
_ صار عمي .



خرج  خلف وفائز من عند الحجي علي الملاچ وهو مزهوا بهذه السیاره الحدیثه التي استلمها فورد مودیل 1952 وتفاخر بها . حاول ان یتصل مرتین بروزه لیخرج معها ثم استجابت لنداءه وخرجت معه لیتنزها قلیلا بسیارة الحجي علي عند احد متنزهات الکاظمیه عند الجسر . ..
_ لازم ارجع للبیت .
_ حبیبتي تدرین اشگد صایر ما شایفچ ؟ وهسه تریدین تروحین ؟
_ بلکت خابر علیک حجي علي لو رادک بمشوار ؟ شتگول بالله ؟ اترید یاخذون السیاره منک ؟ 
_ ها .. مو .. زین اگدر اشوفچ هالاسبوع ؟
_ تجیني بت عمي من فرنسا ولازم اتحضر لهم .
_ لعد مو تنسین اتخابرین ؟
_ لایظل بالک اخابرک .
_ احبچ ...
_ یلا خلي نرجع ..
.....

رجعت روزه للبیت ونادت علی خلف .
_ وینک خلف ؟
_ تفضلي ست روزه ؟
_ البارحه خابرني حجي علي ایگول چم مره خابرت علی هذا السایق الجدید ومارد علی التلیفون .
_ منو ؟
_ هذا فائز ابن محلتکم . مو یشتغل یم حجي علي ؟ 
_ أي ست ؛ نعم یشتغل یمهم .
_ ایگول نعیم  الصباغ شایفه امصعد ابنیه ویاه بالسیاره . گول لمرته خلي یداوم بشغله . مو بعدین مرت الحجي تزعل .
_ صار ست الیوم اوصل الخبر لمرته .
فعلا اوصل خلف موضوع صعود امرأة لجانب فائز بالسیاره لزوجة فائز .
_ ماکو غیرها هي صعدت ویاه ؟
_ وچ دا اگوللچ الست اتگول نعیم شایفهم بالسیاره  ؟ وهاي سیارة الناس ومخابرین علیه چم مره . میصیر هیچي ؟
_ خلف اشلون مدا اشوف ماکو غیرها هي صاعده ویاه بالسیاره .
_ بابا جوزي من الشکوک . لاتصیرین شکوکیه . الله ایگول ان بعض الظن اثم . 
_ ما اعرف بس گلبي یحس غیر شکل .
......




عاد فائز لبیته وسط صیاح زوجته سلمی التي عاتبته 
_ خلصنا من التلفونات ؛ هالمره السیارات . ؟
_ شکوش یا ستار ؟ 
_ ماکو شي . بس انصعد روزه ویانه ونفتر بالسیاره ؟ مو ؟
_ منو گللچ ؟
_ تالیها ویاها ؟ اشلون بالله . اشوکت اتجوز منها ؟ 
_ یا روزه ؟ هاي اشبیچ ؟
 _ روح اسئل حجي علي مخابر علیک ستین مره وجنابک کاظیها ویا روزه خانم بالحدایق .. عبالک الناس عمیان میشوفون .؟ هو بغداد هلگد داته . 
_ ولچ نصي حسچ تالیها اشلون ؟ 
_ لیش متجوز منها وتخلصنا . 
الحاج علي الملاک لم یتفوه بکلمه بل غض النظر وقال فائز : 
_ العفو حجي البارحه اشویه کنت مشغول وصارت لي شغله ..
_ میخالف میخالف ..
بعدها بفترة ...
 خلف انقطعت علاقته بفائز فهو قد تلقی وعداً ان یکون سائقاً لدی احد الوجهاء المعروفین ولربما الشخصیات بالدوله ولاسیما ان روزه قد حدثته ان احد الوزراء قد اعجب بسیاقته وهدوءه والتزامه بملابسه وقیافته واحترامه للوقت مما زاد من غبطته وقالت له 
_ خلف آني مو دایمتلک ؛ گبل یومین شافني واحد من هذول ؛ کبارات البلد  وعجبته سیاقتک ویمکن یاخذوک من یمي اذا حبیت . انت ابکیفک بعد 
_ ست گضیت العمر کله ویاچ اشلون اعوفچ ؟
 _ مو گتلک خلف یمکن اروح لفرنسا یم بیت عمي وا طول هناک ولیش تبقی بلا شغل . احسبلک راتب بغیابک بس هماتین لازم تشتغل علی الاقل علمود ولدک کبروا یرادلهم مصاریف .
_ اي والله ست بنتي الچبیره جایین علیها خطابه والبقیه الله یکون بالعون .
_ لا تهتم خلف اني یمک . واي شي احتاجیت یجرالک انت خوش ادمي ابن حموله .
_ الله یسلمچ ست . 
_ هذا رقم تلفون خلیه یمک تگدر اتروح هسه لبیت ال (..... ) وبعدین ایفهموک وین تتهیآ للشغل .. 
_ ست قصدچ من هسه تستغنین عني ؟ 
_ لا خلف مو گلت لک ارچع بین فتره وفتره بس یمکن اطول هالمره .. وخیر البر عاجله .
بعد اسبوع سافرت روزه مره اخری الی فرنسا وطال بقائها هناک لمده اکثر من اربع اشهر .  اما فائز فقد کان اکثر وقته بالسیاره وهو لایعلم انها هدیه اهدتها له روزه باتفاق بینها و بین الحجي علي و دون علمه .. حتی استطاع فائز ان یعمل باوقات فراغه بالسیاره من اجل ان یعیل نفسه وعائلته . 
بقي خلف الخزرچي سائقاً لدی الدیوان الملکي ومن ثم  لیصبح السائق الخاص للوصي علی عرش العراق الامیر عبد الاله لامانته وصدقه والتزامه ولبسه الانیق .. 
بعد ثورة 14 تموز عادت روزه للعراق عام 1961 للعراق وکأنها اشتاقت للذین فقدتهم ومنهم خلف  و فائز لتعرف مصیرهم حتی توصلت الیه وهو لازال یعمل سائقاً باحدی السیارات القدیمه وبعثت وراءه .فجاء وهو بمعیة ابنه الصغیر بالسیاره غیر مصدق انه سیلتقي بروزه ربما کبرت وشاخت وربما تزوجت غیره ربما اصبحت ذو جمال اکثر اشراقاً ولاسیما انه سمع من اقرانه السواق ان البنات بالخارج یزدادن حلاوة و طراوة ..
 لم یطیل الحدیث بینهم کثیرا بل جائت له بهدیه بسیطه هي سیارة فالکون جدیده لیعمل علیها وربما یکون هذا عربون اخر لمحبتها له ولاتنسی ماعاناه هو ... 
_ هذیچ المره سویتي خطه انتي وحجي علي  وعفتولي سیاره وآني غشیم مچنت اعرف هاي منچ ؟ وهالمره اتریدین تعوفین سیارة لوخ إللي ؟ لیش اشگالولچ ؟
_ مو أتگول احبچ روزه وما اگدر انساچ ؟
_ أي روزه ولایوم بعمري نسیتچ ؟
_ خلص هاي هدیتي یمک دیر بالک علیها . 
_ انتي اشلونچ هناک ؟
_ فد یوم تجیني هناک واتشوفني وتتعرف علی رجلي .
.....
 لم یقل شیئاً بل اوصلته لباب الکراج واعطته مفاتیح السیاره ودموعها خلف جفنیها قد غطت بهما کل القلب وأهاته .. ربما ارادت ان تقول له تعالا لاضمک بین عیوني وتعال کي امسکک بقوة ان لاتفلت مني .. ومن ثم عینها علی طفله البشوش ...یا تری ؟
هل صدقت انها قد تزوجت ؟ ربما خدعته ولاترید ان یبني أیة آمال علیها ...
_ لازم اشوفچ روزه ؟
_ ماشاء الله ابنک حلو طالع علی امهم ؛ مو علیک اسمر . صدگ شنو اخبار خلف ؟
_ ما اعرف والله . بس من صارت الجمهوریه وخلف گعد بالبیت بعد ما دریت اشصار بیه . 
_ الحمد لله لان سمعت العائله المالکه کلها انکتلوا حتی الطباخ . همزین خلف ما چان یمهم .. الحمد لله .
......
بعد ان تکسرت القلوب الثلاثه رحلت روزه الی کندا تارکة العراق  للابد وذکریات اول حب یتحطم فیها قلبها لیترک فائز العراق بعدها لیبحث عن روزه ولو بکلمات ان یکتب معها حتی ولو بالسلام یبحث عنها بکل الدنیا سائلاً جمیع من یعرفهم ان یآتوا له بخبر عن روزه . کیف تنام وکیف تصحو وماذا تآکل ومتی تتعشی وهل لازالت بنفس تلک القوه حینما کانت تسیر بعبائتها وسط شارع الرشید والکل یهابونها ؟ ام انه تسبب في کسر قلبها الرقیق الشفاف ؟ لازال فائز یشعر بالذنب الکبیر . وهو یعشقها ویحب زوجته ایضا . 
اتصلت شخصیاً به بعد هذا العمر لاسئله هل لازلت تحب روزه ؟ 
رد قائلاً : ولیهسه مرتي زعلانه مني تدري روزه ابگلبي .
قلت له سانشر قصة  حبکم انتم الثلاثه ؟ ردت زوجته والله العظیم آني احبه اکثر من روحي وسامحت روزه لان هيي ایضا وفیه وصادقه بالحب .. بس اغار منها . 
_ لعد لیش ما صعدتي ویا فائز بسیاره الفورد ؟
_ لو تذبحني . هاي هدیتها . اشلون اصعد بسیاره روزه ؟ 
_ دا اسمع صوت محمد عبد الوهاب ابیتکم ؟
_ هاي الاغنیه کانت اتحبها روزه اسمها جفنه علم الغزل ..
_ زین ؛ اصحاب المحلات سمعت کانوا یضوجون منک ؟ صحیح ؟
_ مو کلهم کم واحد شافني ویا ست روزه ؛ یمکن الغیره لو الحسد ؟ الله اعلم .
_  روزه ماتغیرت نفسیتها من بعد ما سمعت انت متزوج وایجوز اثر هذا علی تصرفها ویا اصحاب المحلات ؟
_ لا ابداً . بس مثل ما گلت مجرد حسد ؛ شافوني صانع ابیع جبن وفچآة عندي سیاره . اشلون میضوجون ؟
_ واشصار من خلف الخزرجي بعدین ؟ طردوه من وراکم من الشغل لو شنو ؟
_ لا . روزه کانت وفیه ویاه ... خلف بقی یشتغل فتره سائق ویاها الی ان ترکت روزه  العراق ؛ بس قبلها روزه لگت وظیفه حسب معارفها لخلف ویلا طلعت من العراق . وبعدین خلف راح اشتغل وصار السابق الخاص للوصي عبد الاله الی ان صارت ثورة 14 تموز وبعدها انگطعت اخباره ... ....
......
فعلا ان الحیاة لها حرکات غیر طبیعیه من حب وحرمان و وفاء  وترک وبعد وهجر وغدر وربما لقاء ... من یدري بعد هذا العمر ! ... 
انتهت ...
 اسعدتم اوقاتاً...........










































































































Reacties

من قصص اهل بغداد .. حب الملایه عشق ازلي ... الجزء الثاني .. فاضل شناشیل 
استمر فائز بمغازلة الست روزه حتی نهضت یوماً من حلمها الحقیقي لتجد إنها قد وقعت  فریسة الغرام بهذا الرجل فقد جمعتهم خصال مشترکه والحدیث کان یطول بینهم لساعات متآخره من اللیل .. 
_ خیرچ ام حسن ؟
_ ها ؟ ماکو شي ست ؛ فرد وحده جانت جایه تسئل علی خلف ..
_ لیش وینه خلف ؟ 
_ طالع گال اروح لکمب الارمن اسوي السیاره وارچع ..
_ خاف مرته ؟ چان خلیتیها اتخش الی ان یرجع خلف .؟
_ راحت ؛ گالت ارجع بعدین علی خلف ..
 _ خرج فائز مع السیده روزه وهي تهدیه الکتب وبعض الهدایا التي جائت بها من باریس اثناء زیارتها لهناک حیث عمها کان یسکن باریس قبل ان یترک العراق للابد .. وعلاقة روزه بعمها لم تنقطع فاثناء کل زیارة تآخذ من حدیقتها عثک تمر لعمها حیث یفضل تمر بیت اخیه علی باقي التمور . 
 خلف کان امیناً و صادقاً مع الست روزه ؛ ینقل لها کل مایدور من عمل خیر هنا وهناک ولایقبل بشئ یضر البیت الذي یعتاش منه ..
_ اوقفت احدی النساء سیاره خلف وبداخلها روزه فوقف لها .
_ یا یوم علی کیفچ ؛ اشلون الله ستر وما سحگتچ .
_ اسحگني خلف ولایهمک .
_ میهمني شنو ؟ اتریدین اتذبین دمچ برگبتي ؟ سیاره اشکبرها اشعرضها ؟ اشلون اتچیتین گدامها ؟
_ رحتلک چم مره لبیت الخاتون وما لگیتک . اریدک بشغله خلف الله یرضی علیک .
_ من اخلص شغلي اني اجیچ للبیت . لایظل فکرچ .
_ قربان وجهک مو تنسی . 
_ خلص گلت لچ لایظل فکرچ .
.....

_ اشلون ناس هذول ؟ اشلون الله ستر وما سحگتها ؟

 ردت روزه التي اصیبت هي الاخری بحالة من الرعب چراء هذا التوقف السریع المفاچئ للسیاره وخظر تلک المرأة التي حاولت ان ترمي بنفسها امام السیاره . 
_ دیر بالک . الله ستر . شنو تعرفها خلف ؟
_ أي ست . هاي بت حجي هادي ابو العروک .
_ اشلون عرفتک ؟
_ من السیاره ؛ بس اخش للمحلة الکل یعرفوني . 
_ وصلني للبیت وارجع لها ؛ شوف شترید ؟ 
_ ایجوز طلابتها ویا رجلها لو ویا خوالها علمود ورث امها . 
_ خطیه ..
عاد خلف لبیت سلمی سلم علیها وعلی ابیها واراد ان یعرف حاجتها ولماذا هکذا رمت بنفسها امام السیاره . 
 _ تدرین الیوم وکعتي گلبي وگلب ست روزه ؟ خطیه ماتت من الخوف من وراچ ؟ لیش هیچي اتچیتین گدام السیاره ؟ شنو خبال ؟ خو مو اخبال ؟
_ لیش إللي چانت ویاک هي روزه نفسها ؟ 
_ إي .
_ خلف فدوه صار اربع شهور رجلي دیروح یمها لهاي ال روزه .
_ رجلچ منو ؟ 
_ فائز .
_ ما اعرفه . لیش اشوکت اتزوجتي واشوکت صار عندچ رجال ؟  سبحان الله صدفة دا اگول لها للخاتون ایجوز عدها طلابه ویا رجلها . طلعتي متزوجه ؟ هی مگموعه . 




_ صار سنه اتزوجنا .
_ لعد ابوچ لیش ما گال ؟ والله کبرتي ولچ ؟
_ گالولي انت تشتغل یم هاي الزنگینه روزه ؟
_ أي اشبیها ؟
_ گول لها صدک رجلي یجي یمچ ؟
_ شنو هالحچي ؟ بالله تالي عمري اسئل هالسؤال ؟ شنو ماعندي وجدان لو أمروه ؟ عیب شنو هالسؤال ؟
_ فدوه خلف اذا اترید اني اجي واسئلها ؟
_ ماعندج صوره لرجلچ ؟ دشوفیني ایاه بلکي اعرفه ؟ لو شایفه ؟ 
_ اوگف خلي اطلعهن بالکنتور خالتهن . بالصندقچه الزغیره بیهن صور اهلي هماتین .
_ د جیبیهن خلي اشوف ؟ بلکي اعرفه ؟ لیش ابن من اللي اخذتیه ؟
_ ابن حجي مصطفی اللي چانوا هنا وبعدین شالوا وگعدوا بذاک الصوب .
_ ما اتذکر والله . بس هالوجه مو غریب علي . 
_ انت بس اسئل هاي روزه گول لها صدگ یجي یمها ؟ 
_ تری صدگ ماعندچ عقل ؟ اشلون اسئل هیچي سؤال ؟ .
_ ایگولولي ایحبها ویکتب لها شعر . 
_ ألمن ؟
_ إل هاي ست روزه .
_ عجیب ؟ .
حاول خلف الخزرجي ان یحدث  السیدة روزه بالموضوع ولکن کیف ؟ فهو لایرید ان یخسر وظیفته وکذلک لایرید خسران موقف السیده روزه التي تکرمه وعائلته دوماً . 
 روزه هي الاخری صارحت فائز بحبها له قائلة : شوف فائز ؟ اشگد رجال شفت بحیاتي واشگد شخصیات وکبار ما دخل احد بیهم گلبي غیرک . واني صریحه ویاک وما راح اترکک ابد . ونعیش احلی ایامنا وعن قریب اشوفلک شغل یمي تترک شغل التکان یم ابو مرعي ابو الجبن بالرشید . ممکن اتصیر شاعر وکاتب چبیر مو اتظل اتملح جبن واتخشش جبن بالبستوکه واتبیع طرشي وکل یوم ایدیناتک مصبوغه وریحة الخل بکل جسمک ..
ضحک فائز الذي کان یعشقها بکل روحه وبکل جوارحه وبنفس الوقت  کان یعاني الامرین . فلقد اخفی حقیقة زواجه من حبیبته روزه وبنفس الوقت لایستطیع ترک زوجته لانها قریبته و زوجته تحبه ولاترید خسرانه . وروزه هي الاخری لاتعلم بهذا الزواج وهي احبت لاول مره وهنا الطامة الکبری . ربما عدم تجربتها بالحب جعلتها تتمسک بفائز الذي کان یتلو لها من صحائف وجناتها کل یوم شعراً وازداد تعلقه بروزه بشکل غیر طبیعي .


 
_ خلف اشبیها هاي المریه چانت ؟
_ یا مریه ست ؟ 
_ إللي هذاک الیوم شمرت نفسها گدام السیاره وهمزین لو ما البریک چان ماتت ؟ 
_ اها مرت فائز ؟
_ فائز منو ؟
_ لا .لا .. هاي . ما ادري والله . 
 ارتبک خلف من زلة لسانه الذي حاول ان یخفي موضوع فائز عن السیده روزه . لکن روزه انتبهت علی تلعثم خلف وعدم اجابته بوضوح هذه المره .
_ هاي اول مره اشوفک تتلعثم بالحچي ؟ اکو شي ؟ 
_ لا .. لا العفو اشویه ریگي .
_ نشف ریگک ؟ شنو ؟
_ لا . من ردت اسولف . مدري اشردت اگول .
_ گول الصدگ. خلف .
_ ست دخلي من نوصل للبیت واسولف لچ .
_ ولو هاي مو اول مره اتفاچئني بسوالفک ؛ بس ولایهمک بالبیت بالبیت یلا . 
في الطریق تمنی خلف ان تنسی الست روزه الموضوع لکي یعود الیوم بلا دوخات راس کما کان یقول .
روزه لم تنسی . ایه خلف شنو المفاجآه ؟
_ مو مفاجأه بس الموضوع یم فائز . 
_ فائز منو ؟
_ هاي المریه اللي رادت اتذب نفسها هذاک الیوم گدام السیاره اتگول انی مرت فائز وفائز یجیکم  للقصر . گتلها لا منو کلچ ؟ بالقصر بس اقارب الست روزه یجون واني وام حسن واشحده للي یخش للقصر حتی الچلب ایملخه اتملخ غیر ؟
کانت روزه تستمع بهدوء وصبر عمیق دون ان تتفوه بکلمه واحده .
_ کمل خلف ؟
_ اي .. ف ... گتلها البیت اللي اشتغل بیه ، بیت ناس محترمین وباشوات  وایجوز بالغلط گایلین رجلچ فایت من یمنا . بس الله شاهد اني ما شایف رچلچ ولا فرد یوم . .
_ روح خلف للبیت الوکت متآخر علیک .
_ محتاجه شي ست ؟
_ لا الله ویاک . سلملي علی البیت .
_ الله یسلمچ ست ..
 بعدها بایام صارحت روزه فائز بحقیقه الامر وانه متزوج وزوجته ارادت ان ترمي بنفسها امام السیاره فلماذا اخفي علیها ؟
_ لویش ضمیت علي ؟ شنو إللي خلاک اتضم الحچي ؟ 
_ مو ؟
_ مو شنو ؟ بعد ما حبیتک وهسه طلعت متزوج ؟ چان من الاول اتگوللي روزه آني متزوج واریدچ .
 _ روزه والله العظیم احبچ .. احبچ مو بیدي . صحیح ضمیت علیچ اني متزوج . بس ما گدرت اضم شعوري من شفتچ والناس کلها تتغزل بیچ وباخلاقچ ایسولفون . چنت اتمنی اتکونین إللي آني .
_ وما فکرت بمرتک ؟ صارلنا اکثر من خمس تشهور انحب بعضنا وتالیها طلعت متزوج ؟ 
_  لحظتها نسیت نفسي ونسیت اني دا اعیش بعالم روزه وخیالات روزه کبل ما اشوفچ . ایجوز اتگولین عني مخبل ؛ اي شي ؛ بس هي هاي الحقیقه . حبیتچ وظلیت ایام ولیالي اکتب واسهر عنچ . نوبات انام بصف مرتي واحس کانه انتي ابصفي مو زوجتي . 
_ هاي خیانه !
_ شتسمیها سمیها روزه . خلي یعدموني علی خیانتي واتمنی هسه ایعدموني . بس انتي لاتضیعیین من ایدي .
_ علمود ثروتي حبیتني مو ؟
_ والله لا ثروتچ اتهمني ولا اي شي بدنیاي غیرچ انتي وبس . 
_ یا انتي وبس ؟ ها ؟ انت هسه کسرت گلبین ؟ تعرف لو لا ؟ 
_ واني لیش متحسین بگلبي ؟
_ وشنو ذنب مرتک ؟
_ ما اعرف .. ما اعرف .. ... ادري الله ایذبني بالنار . بس مو بیدي ... احبچ .. اي احبچ ..
_ ولک مو تدري اني هماتین حبیتک ؟ لیش هیچي سویت ؟ لیش ها ؟ لیش ساکت ؟ جاوبني ؟
_ روزه والله دموعچ غالیات . ما اریدچ تبچین . حبیتچ من کل گلبي .. آني .. 
_ بعمري مانزلت دموعي ومحد کسر گلبي غیرک . لیش سویت هیچي بیي ؟ 
_ روزه تدرین من ایعزلون کل التکاکین بشارع الرشید چنت  احفظ مکان طبع رجلچ ارجع وادنج علمود ابوس مکان طبع رجلچ . گولي عني مخبل ! مو مشکله .. بس والله احبچ وحق کلمن خلق السماوات حبیتچ وحق کل من رفع عیسی رفعتج بیدي وحق کلمن حچی ویا موسی حچیت ویا روحي اللي انتي روزه بداخلي وحق کلمن ضم یونس بالحوت ضمیتچ بگلبي وحق کلمن رفع نوح لسفینته شلتچ ویاي فوگ راسي .
_ تحلف بهذول وتکسر گلوب الناس ؟ شتسمیها مو خیانه هاي ؟ 
 _ گلت لچ والله ما خنت احد بیکم . بس مدري اشجرالي وحبیتچ ومن یومها غرامچ وعشقچ مایروح من خیالي .
_ وترجع وتنام بحضن مرتک وتضحک علی روزه ؟ مو 
_ والله یا روزه ... آني .. آني  .. روزه نوبات اگعد تالي اللیل وابنصاص اللیالي افتح الرادیون بالهول متجیني النومه اگعد افکر بیچ . اگلب بالموجات الی ان توگع ایدي علی محطه واسمع لو عبد الوهاب جفنه علمه الغزل لو اسمع الگبنچي واهات المقام واتمناچ بنفس اللحظه اتسمعین ویاي هالاغنیه .
 _ ولیش اني مو نفس الشي من تروح للبیت اگعد افتح الرادیون وادور علی اغنیه لام کلثوم لو اسمهان واتمناک یمي بانصاص اللیالي واگول علواه لو هسه اگعد ویاه للصبح بالبالکون اسمع الاغاني الی ان ایإذن الچامع ونسمع وراها صوت البلبل بالرادیو ویطلع القران واندعي یارب بلکت قسمتي اتصیر ویاک . بس 
_ بس شنو روزه ؟
_ روح ..روح من یمي هسه . لاتخلیني اخرمشک باظافري ؟ خلیني ابدردي .
حاول ان یخفف عنها ولو بابتسامه قائلاً : حبیبتي کافي دموع . ذکرتیني بالملایه فهیمه نفس الصوت .
بین الدموع لاتدري هل تضحک ام تستمر بالبکاء علی هاي القسمه ... 
_ روح ... اي روح هسه من یمي ... ما ارید اشوفک ..
 جلست لوحدها بعد هذه الصدمه الکبیره لاتعي ما تفعل ولایفهم احدا بالبیت ماذا ترید فأم حسن الطباخه محتاره بطبخ الیوم ماذا تطبخ وخلف السائق لایدري هل یذهب للبیت ام یبقی فروزه بغرفتها لوحدها ولا احد سوی صوت الانین . ایعقل ان روزه القویه تکسرت بلحظه ما ؟ ..

رجع فائز حزیناً للبیت فهو قد حطم ثلاث قلوب معاً . قلب زوجته التي تریده وتحبه . وقلب روزه المسکینه التي عشقته بصفاء النیه ضناً منها ان الحب یولد هکذا . 
اتصلت صباحا بعمها بفرنسا قائلا لها : اول مره اشوف بنت اخویه حزنانه ؟ جیبي عثگ  تمر ویاچ وتعالي یمنا مشتاقین إلچ .
 في الصباح اتصلت بشرکات الطیران لیتم الحجز علی الطیران السویدي لقبرص ثم باریس بعد یومین . ذهبت لحیث عمها هناک ترید ان تغیر الاجواء فهي مکسوره الخاطر والوجدان واحست لاول مره بالالم من جراء هذا الغدر بالحب . ولازالت تحب فائز ولکنها فضلت الابتعاد عنه کیما یعود لزوجته المسکینه . وفائز هو الاخر محطم نفسیاً فتلک الاشعار والکتب الادبیه التي یقرأها زادت من حزنه وبعد حبیبته روزه التي مافکر في یوم من الایام ان یطمع بثروتها بل کان طامعاً بهیبتها وقوة شخصیتها وجرإتها و الادب الذي تملکه ، فکیف به الیوم وهو یکسر هذه المرأة القویه ؟ فآي ظلم هذا الذي فعله فائز بحق هذه الجمیله الخلق الطیبه ؟
و سلمی  زوجة فائز هي الاخری خائفه من فقدان زوجها وحبیبها وان لایضیع منها هذا الکادح المجد بالعمل ولم یشکي یوماً لها هموم عمله بل کان کاظماً لغیظه . وتتوسل زوجته بخلف الخزرجي ان یفاتح الموضوع مع الست روزه لکي یعود الیها زوجها . و فائز یقول لزوجته والله ما اعوفچ بس مو بیدي حبیت روزه . . شنو ذنبي ؟ 
وسلمی تقول ( ما اعرف هالحچي ؟ انت إللي مو لروزه )  اعوف الدنیا کلها بس ما اعوفک وما اریدک اتعوفني.
_ ولچ منو دلاچ بیتها ؟ لیش هیچي لیش ؟ اشسویتي بيي ؟
_ وانت کل یوم أتموتني قهر تروح لبیت روزه ؟ لیش ؟ ... ها .. ابشنو قصرت ویاک ؟ 
_ من الله یاخذ روحچ ویخلصني لیش هیچي لیش ؟ ... وچ ابیش قصرت ویاچ ؟
_ قصرت هوایه ویاي . . .اذا الله موجود کون هسه یاخذ روحي ویخلصني حتی ترتاح ..
_ ولچ المریه بت ناس ومحترمه وما گالت شي . اشوداچ لبیتها اشدلاچ ؟ 
_ والله شمرت نفسي گدام سیارة خلف من وراک ؛ گلت بلکن یسحگني وترتاح .
_ ولچ لیش ؟ لیش ...  لیش 
_ هسه گاعد تبچي علیها ؟ لیش ما بچیت علی حالي لعد  ؟ کل یوم اگابل الحیطان ودموعي اتخر وانت رایح تسرح ویاها بدنیا العشک . مو بیدکم ؛ ریاجیل عینکم متشبع . 
_ ولچ کافي ؟ کافي ... کافي عاد ؟ خلیني ابدردي ؟ 
_ شوف اشلون تبچي علیها هسه ؟ رجعني لبیت اهلي ..اي رجعني .. ولو ماعندي احد وآني حاسبتک  انت کل اهلي ... بس ما اموت .. اي محد ایموت من الجوع ... هماتین اگدر اعیش اکل خبزه منا مناک .. الله چبیر ومینسی الظلم .
_ ولچ والله ما ظلمتچ ؟ احبچ انتي هماتین بس ، مو بیدي حبیت هالانسانه من صدگ .
 _ آني علی گد حالتي ما اعرف من هالشعر والاغاني ؛ ما گاعده بالمدرسه شسوي مخلوني اتعلم . چان هسه هماتین اگوللک مثلها چم کلمه حلوه لو اغنیلک . شسوي بختي هاي .
_ جوزي عاد . بیا حال آني وأنتي بیا حال ؟
_ إي غیر هايه إللي چانت إتگوللک من عدهن ، من الکتب مدري ، من القوانات مالت الرادیون .
_ وین اروح ؟ یاربي ؟ لیش هیچي .... لیش ؟
...
...... تکسرت ثلاثة قلوب بآن واحد وصاحب کان احد الذین یحملون حقداً علی فائز فهو قد استآجر محلاً  من السیده روزه بشارع الرشید قرب الاوروزدي باک فکانت تتساهل معه احیاناً ببعض المسائل ... ویبدوا ان مزاج روزه قد تغیر بسبب هذا الفائز تجاه الرجال !! لا ادري .... ربما کنت مخطئاً .
یاتری 
هل داست روزه علی قلبها وترکت هذا الفائز بحبها ؟ .... 
 وهل طلق فائز زوجته من اجل روزه المسکینه ... ؟ ولماذا بکت عندما تذکرت ضحکنها معه وسط المطر بباحة الحوش ؟ وهي بباریس تتآلم ؟ 
لماذا کرهت سلمی الصعود بسیارة الفورد مودیل 1960 التي یسوقها فائز لاحقاً ؟ 
غدا سنکمل ..



 اسعدتم اوقاتاً ....












































































































































Reacties


بغدادیات ... صوت الملایه من محلاتنا .عنفوان أمرأة .. ( الجزء الاول ) ...فاضل شناشیل
 کانوا یعجبون بشکلها وهو یمعن النظر بوجوه هؤلاء الرجال الذین یتوددون لها باعذ ب الکلمات والتلمیحات فلم تکن تهتم لجمیع هؤلاء ومنهم الدکتور عدنان والمدرس احمد وکثیرین کانوا یتمنون ولو بلحظة ان یلتقوا بها لیحدثوها عن اعجابهم بها .. 
 لها من الجاذبیة الساحره بکلماتها ورقة لطافتها بالرد علی الناس فقد کان یستحي منها حتی إولئک ( العربنچیة بجادة الرشید وغازي ) فقد کانوا مشهورین بسطوة لسانهم علی اخلاقهم . لکنهم امام هذه المرأة یفقدون کل کلمة فلا یسعهم الا وان یحترموها .لماذا کان کل هذا الاحترام ؟



تملک شخصیة غریبة وذو کبریاء جمیل ؛عندما تسیر بجادة الرشید وعبائتها اللماعة یدخل جمیع اصحاب المحلات لمحلاتهم احتراماً لها ولخلقها العالي . البعض من الناس یحفظ اماکن سیرها ؛ قویة رشیقة تناقش وتجادل بکل شي . لم یمل منها احداً بل کانت النساء تغیرن منها لما تملکه من قوة الشخصیه لذا احبها جمیع من یعرفها وتمنوا ان یقترنوا بها والبعض یریدها له لوحده دون الناس حتی ولو دفعوا عمرهم ...
 فائز کان اصغر هؤلاء الرجال یسجل کل حرکات الرجال ماذا یقولون وکیف یسطرون لها الاشعار وکیف اعجب بها ابن الباشا ایضا لکنها لم توليه الاهتمام الا بحدود الاحترام المتبادل ؛ روزه اسمها الجمیل فقد اسمی اغلب اصحاب المحلات والمعلمین اسماء بناتهم علی اسمها وتمنوا لو وصلت ابنتهم لمستوی ( روزه ) بالخلق والمعرفة .



 
حتی ان بعض الرجال کان یغار منها عندما ترد علیهم بالحجج المقنعه . 
 حاول فائز ان یجرب حظه مع روزة ان یکتب لها شیئاً ؛ نظرت بتلک الورقة التي ارسلها لها فائز . هو اصغر من المعلمین والاطباء علماً وشهادة فکیف سیجاري هذه ( الروزة ) . ! 
بعث لها برسالة محبه وتعارف ؛ تمعنت بتلک الرسالة جیداً من یکون هذا ال ( فائز ) ؛ بعثت  وراءه ؛ لم یصدق عیناه ! لماذا بعثت ورائي ؟ هل ستردني هذه المرأة القویه ؟ وماذا ستقول لي ؟ یا لوقاحتي . کیف تجرأت وبعثت لها اعجابي ؟ من اکون أنا ؟ هذه لم تهتم لکل هؤلاء الرچال بما فیهم الدکتور عدنان والمعلم احمد واخرین . من اکون انا ؟ کي ابعث لها برسالة اعجاب ؟ ستخرج کل قسوتها وقوتها وبضربة واحدة ربما ستلکمني ارضاً . اي ..
 هسه آني شجاني و دزیت لها رسالة ؟ فوک الدرد اتگول تعال ارید اشوفک ؟ بالله شگول لها ؟ آني والحب والاعجاب شنو ؟ لو گالتلي اتحبني اشراح اگول لها ؟ اذا هم اصحاب المحلات کلهم من ایشوفوها ایخشون بمحلاتهم من الاحترام فآني بیا وجه اواجهها ؟ ایجوز تسئلني اشرح لي الحب بالله ؟ شگول ؟ . سمعت ابیتها عدها چلب چبیر بالحدیقة یمکن لو بس اتهدها علي یاکل حتی اعظامي ؟ .... دخیلک یابو الجوادین و دخیلک یا ابو صالح الکیلاني اوزع کل خبزات تنور ام اسماعیل بمحلتنا وانطیها افلوسها بس کون اتعدي علی خیر . زین . اگول ؟
آني إشکتب لها ؟  کون اتذکرهن یاربي . اوگف اوگف .. گلت انتي سیدة محترمه ..اي هاي بالبدایه . وبعدین ان ذکراک الذي مر ببالي واعجابي لیس بک انما بالذین اعجبوا بک جعلني احب اسمک واتمسک بثوب محبتک . اعذریني لا اقصد ثوب لبسک ؛ انما خیط الامل . لست کالدکتور عدنان او المعلم احمد یملکون کل ثقافات الکتب ؛ فاناً تعلمت من هؤلاء الناس البسطاء الذین یتمنون ان یحبوک . وکتبت الی من کان یهمه الورد انا اذبل . ولذا قلت لاطیر بفرسي واسبقهم ربما ساکون الفرس الاخیر یخسر هذه الورقه . ملاحظة . لقد وضعت قلیلا من الکولونیا علی الورقه ارجوا ان تشمیها ) ..
 اي أي کتبت لها هالکلمات ولو کلماتي مخربطه نصهن بس یالله . لو اتخیب لو اتصیب . المشکله انه هسه دازه وراي واجاني هذا الرجال بیده الپایب مثل الانکلیز ایدخن وجاي امخنزر ( انت اللي کاتب هاي الرساله ؟) .. گلت له بعد تردد .. إي عمو آني کتبتها .... وبیني وبینکم چنت مرعوب لایهفني بالپایب وجمرة الثثن یچي ابوجهي وایشوه شکلي ) ... المهم تعال هسه المدام اتگول ارید اشوف من کاتب هالرساله ؟..
ذهبت معه بسیارته الشوفرلیت مودیل 1950 اوصلني الی بیتها . کان بیتها جمیلا نسبیا لایشبه بیوتتنا حیث یلتصق البیت علی بیت اخر . انما هناک حدیقة امام الدار وثمة کلب انکلیزي وشرفة البیت الکبیر کان هناک طاولة جلوس مع کرسیین فقط لاغیرهما . یبدوا ان الست روزه تجلس هناک فوق الشرفه وتستمع لضیف او احد اقاربها او ربما احد الذین یعملون لدیها . اي ماکو غیرها هذا الکرسي اللاخ مو لواحد مثلي کتکتوت میعرف شي بالحب واتورط وکتب کلمتین ودزها لهاي الست .. یارب نذرت نذرین بس کون إتعدي علی خیر ..
 نهضت من مکانها وهي بکامل اناقتها وجمالها وتصورتها انها نمره ستفترسني فثوبها یشبه ثوب النمور مرت من امامي وهي تقول 
_ إگعد استریح استریح .
 کیف اجلس ؟ وأنا قد تجرأت وکتبت لها عده کلمات ربما جرحت شعورها . لکن الي این ذهبت ؟ ربما لتخبر الخادمه ان تحضر لي شیئاً لاتناوله ... لا ادري ربما یخبرون الجلاد ان یجلدني کم قمچي .. لا اعرف ..... بعد ربع ساعه من الانتظار دخلت السیدة الجمیلة بثوب ازرق یشبه ثوب الممثلة الامریکیه لوسیلا بال التي رأیتها بالسینما وکأنه نفس ذالک الثوب ؛ انها تسایر الموظه . ؛ دخلت لغرفتها قبل قلیل وغیرت هذا الثوب لماذ ؟ لا اعلم .. ربما حتی مزاجها بلبس الثوب لها الاتکیت الخاص بهؤلاء النسوه ..
 کنت جالساً خائفاً من المصیر المجهول الذي ستواجهني به وانا جالس لا اقوی علی الکلام . قدمت علبة الحلوی بیدها لي 
_ اتفضل ؟
_ ها ؟ لا لا العفو ..شکرا .
_ میصیر ! معقوله خاش للبیت وما تاخذ شکولاته ؟
_ اول مره اشوف من هالشکولاته . مو جکلیت هذا ؟ 
نادت علی خلف السائق ثم قالت له 
_ شوفته الورقه ؟
_ لا ست بس سئلته انت إللي کاتب رساله للست ؟ گال اي 
_ جیب الورقه وروح انت خلف .
_ اتفضلي ست . 
ترک خلف الرساله علی میز الشاي ثم خرج واغلق الباب وراءه قالت لي شوف هاي رسالتک بالاول ؟
فتحت الرساله واذا بها عبارات  ( سیدتي الفاضله روزه المحترمه اطلب صاحب هذا الدکان محمد علي مبلغا من المال ولن یعیده إللي ولن املک علیه کمبیالات وهذه مصیبتي ولیس لي معین سواک باعتبار انه احد مستاجري محلاتکم اتمنی مساعدتک واني صاحب عائله کبیره .. ) 
_ العفو ست الکل هاي مو رسالتي ؟
_ ادري مو رسالتک .
_ ها . مد افتهم .
_ کتبت لک غیر رساله ونطیتها بید خلف وفهمته ما یگول لک غیر بس کلمتین ؟ انت کاتب رساله للست ؟



_ إ ..
_ شنو مکتوب برسالتک ؟ 
_ ال .. إ ... 
_ لیش حبیتني ؟
 لم یکن امامي إية اجابات وتلعثم لساني وأنا بین یدي هذه المرأة التي یهابها الکل ویحترمونها فلا تبدي إهتماماً لآي رجل . فمن اکون أنا ؟ کي اتودد لها واتجرئ بحبي لها ؟
_ مو ... ال .. ال .. آني ... ال ... حقیقة ... الشسمه ..
_ أول مره إتحب ؟
_ ها .. 
حاولت ان اکذب علیها بأني احب لاول مره . ولکن امام هذه ال( روزة ) یعجز اللسان ان یکذب .
_ کبل حبیت و... 
_ هي هماتین چانت إتحبک مثلک ؟
_ ما ادري . بس ما صارت القسمه .
_ قسمتیش ؟
_ تدرین بعد کل قصه حب ایصیر زواج . 
_ شرط ؟ ایصیر زواج ؟
_ ها .. ما ادري بس هي الدنیا هیچي .
_ شنو إللي عجبک بيي ؟
بقیت ساکتاً لوهله .. لقد اعجبني هدوئها وصوتها . فقلت لها 
_ صوتچ یشبه صوت هاي الملایه یمنا .
اطلقت ضحکه ملئت ارجاء الصالون بالبیت .
_ سویتني ملایه ؟
_ ها ؟ لا مو قصدي . بس حجیه فهیمه صوتها کلش حلو من تقرا بالقرایات .
_ وانت تحضر القرایات مالات النسوان .؟
_ لا بس اباوع من فوک السطح .من ایلطمن وایصیحن . وحجیه فهیمه صوتها یشبه صوتچ.
_ یعني اگدر اصیر ملایه ؟
_ لا لا هذیچ تلبس چرغد اسود اتگول عش مال الطیور فوگ راسها ، وانتي ست شعرچ حلو ماشاء الله .
_استمرت بالضحک ثم سئلتني ان کنت افهم بالموسیقی 
_ اعرف ادگ اشویه دمبک بس بالزکریا اغني یازکریا عودي عليي ..
 استمرت تسئلني عن امور ربما ارادت ان تحفف عني رهبة اللقاء ولا اعرف کیف إني نسیت ما حضرت لاجله واستمر اللقاء قرابة الساعه ونضحک معاً . ثم ذهبت معها الی غرفة ابیها الذي کان یعشق الموسیقی وعلی جدرانها الآت العود وکیف حضرت زهور حسین وسلیمه مراد الی هذا البیت فکان یصدح بالطرب .وحضره کبار معارف والدها و والدتها المهندسه التي ارتحلت عن الدنیا ... 
 أما هو فقد أحتار کیف له ان یعشق هذا المرأة التي لاینقصها شیئاً من هذه الدنیا .حتی الکلب بحدیقتها له بیت صغیر یقیه برد الشتاء وحر الصیف ..
فهل ستعطف علیه ببعض الدنانیر ثم تترکه یرحل ام ستغرس اضافرها الحمراء بجسده وتداویه بنفسها ؟ .و
هل استمر الغزل بینهما للنهایه ؟ نتابع ذلک بالایام القادمه ...
 اسعدتم اوقاتاً





































































Reacties

مدیحه کامل الوجه الحسن یم بیاع الرکي ... فاضل شناشیل 
 ظهر بتلفزیون بغداد مسلسل تؤدي ادوارها الممثله الحسناء اللي اموت علیها مدیحه کامل ومدیحه خو مو مثل مدیحة الحفافه بدربونتنا . 
خزعل چان ایبیع رگي وعنده تکان وابغبش للعلوه ایجیب بیکب رگي وایصیح 
_ رگي حلو وتازه یا ولد علی الچچین ( ما کان یلفظ السین زین ایگول چین ) .
ومن یردن النسوان یشترن من یمه رگي ایباوع علیهن وایگول هاي الرکیه زینه .
_ لا امبسمره مو شي .
_ وین امبچمره ؟ لاحگه .
_ بالله شوف هایه ؟
_ مو ینگلب الرگي کله ؟ .
_ یاااه لعد اترید اتمشي الموزینات براسي خزعل ؟
_ لیش أتکفریني مو دا اگوللچ هاي خوش رگیه .
_ ما لازم . اروح اجیب من الصدریه .
_ متروحین . ... د روحي .... الله مدري منین ایجیب هالشکولات من الصبح .
_ اشبیها اشکولاتنا ها ؟ من عابتلک هالکرش وخشمک عبالک زوره الواویه .
_ دمشي عاد هچه أنتي مدیحه کامل . 
وتروح وتجي وحده لوخ وخزعل ایخنزر علیهن خوش رگي یابه ؟ رآساً تنهزم المریه . ...
هاي اشبیهن یاچتار ؟ هاي لو بمکان مدیحه کامل شیچوون ؟ 

کان

معجب بشکل بمدیحه کامل وایرید یجمع کم دینار حتی یروح ویا حسنین المصري لمصر حتی یشوف مدیحه کامل ؛ وحسنین ایگولله والله ده انا کمان عاوز اشوف مدیحه دي . دي مش حرمه وبس ؟ آمال . دي زي ما بتئول حوریه . اه . بردک حلوي حلوي گوي . 

_ الرگي تازه ؟
_ الصبح جبته .
_ إبیش الحوگه ؟
_ میة فلچ ؟ 
_ أشدعوه .
_ دعوه شنو ؟ من العلوه علینا بثمانین فلچ . وابیش انبیع ها ؟ بدرهم ؟ لو خمچ فلوچ ؟
_ واشبیک متعصب من الصبح ؟ طول خلکک ویا الناس ؟.
_ اشگد رایده ؟ چم کیلو ؟ 
_ طیني هاي الزغیرونه ؟
_ صار لچ چاعه تتعاملین تالیها اتریدین الزغیرونه ؟ .
_ أي غیر علی گد فلوسنا ؟ .
_ هاي صار ربع دینار ؟ 
_ راح انطیک میة فلس والخمیس اجیب الباقي ؟ 
_ اشو د روحي من یمي گبل ما اکچر الرکیه علی راچي . 
_ یاااه صدک مخبل هذا یرید یکسر الرگیه علی راسه ؟
_ انتي مخبله . شکول ماشکول صار لها چاعه ونص ؛ تالیها اترید الزغیرونه اشگد تلافه وصرافه هاي ؟ 
_ عابتلک وعاب الرگي المبسمر مالتک ؟ قحط رگي بالسوک .
_ وچ لو آني الله ؛ چان بچ اخلق مثل مدیحه کامل ، مو هالشکولات .
_ د روح من عاب شکلک وشکل مدیحه المدري منو ؟ مدیحه ؟ عشتوا ؟ ولي . 
_ روحي روحي یم مدیحه الحفافه خلي اتطیرلچ شواربچ .. لابو حتی  شغله الرکي و دوخات النچوان .. شبیع یاربي ؟ شوندر لو شامیه ؟ . .. 
 کان حاط بالتکان صوره مدیحه کامل وایفرفر بشواربه یمنه ویسره ودشداشته الجوزیه والمیزان علی المیز وطاسه بیهن خرده وایجر حسرات روحه مفرفحه علی شوفة مدیحه کامل وتالیها اتزوج مدیحه الحفافه بالعگد ولبس قاط جوزي نازل بنطرونه نصه من ورا کرشه والجاکیت ما یتدگم وفرحان کلش علی لیلة الدخله . ...
 بعد چم شهر مدیحه الحفافه النسوان ما یجن یمها من ورا لسان خزعل من ایخنزر علیهن بالسوک وایکول ترحن فدوه لمدیحه کامل ... وبالبیت بالع لسانه من خوف مدیحه ..
گولوا همزین مرتي الثالثة ام سعدون  ما چانت تشتري من یمه رگي و کلما تفوت من یمه من ورا خنزوراته تنچبح والا چان ایگول علیها خفت عبالک اچماعیل یاچین ...
همزین شلنا من العگد ابسرعه ... وگعدنا بدربونه بیت راضي  ابو الدبس . منو هو راضي ؟ بعدین اسولفلکم عنه ....

صباح الخیر لکم ..........







Reacties


ابو کریم الفراش وحب المدیر العام .... فاضل شناشیل 
_ د أصعد یمي وإشرب کهوه .
_ لا . اجي اشرب چاي یمک .
_ تعالوا أنت وعباس .
 کان فراش المدیر العام بدائرتنا فاستغل فراغ المدیر اثناء زیاراته للوزارة او المؤسسات الاخری ؛ فیطیب للفراش ابو کریم ان یمر علینا للحدیث ؛ حقیقة کنا نرتاح لسوالفه وهو یقرا لنا بالفنجان . کنت استغرب من هذا الرجل الامي کیف له ان یقرأ الطالع . ولم اسمعه یوماً ان تطرق لفنجان موظف او موظفه بالدائرة . .. لقد کان یعمل بالسابق بمعمل البیبسي حتی اخرجوه بلا سبب معروف فجاء وتقدم بطلب للعمل کفراش ومدیر الاداره وافق علی طلبه بحینها ..
سئلته مره هل سآموت یوما بهذه الحرب اللعینة ؟ رد  یقترب منک الموت ثم یولي ادباره ؛ ابتسمت قائلا ربما بفضل دعاء الوالدین قال وبعد رحیلهما ایضا ستبقی . علی اي حال شکرته ..
اثناء مروري بالاستاذ المدیر العام (ز ع ) کنت ابتسم للفراش ابو کریم قائلا له 
_ هنیالک استاذعلی ابو کریم !
_ علویش ؟ چایاته طیبه شنو ؟ نفسه یومیه یخدرهن .
_ لا مو الچایات ؛ بس من یقرآ الفنجان ؟ خوش سوالف إیطلع .
_ صدک تحچي ؟
ظننت انه یعلم بذلک لربما کل یوم یقرأ له الطالع ولکن اتضح انه تفاجئ بالامر .
_ عبالي تدري بیه .
_ عاد یعرف یقرأ ؟ لو شیش بیش ؟
_ جربه استاذ وشوف .
 المدیر العام کان متزوجاً وقد اعجبته احدی المدیرات باحدی الاقسام بمؤسسة اخری والاثنان کانا یتبادلان الرسائل بینهما لیس عن طریق البداله الداخلیه للدائره إحتراما لوظیفته وکان حریصاً علی ان لایکون مراقباً من قبل السلطه . انما بالرسائل التي یرسلها بید السائق مجید بداخل ظرف اسمر من اجل ابعاد الشبهات .وبدوره یاتي السائق مجید برسالة منها . 
لم نکن علی علم بالامر إطلاقاً فهذا شإن المدیر العام حتی جلسنا یوماً  بعد تقاعد ابو کریم وببیته روی لنا حکایات الغرام بین المدیر العام والسیدة ....... مدیره قسم الاخراج باحدی المؤسسات . وبدوري آدون مایقول ثم یبتسم مو تفضحنا عیب . 
_ ولایهمک ابو کریم سولف اشلون اول فنجان قریتله ؟
 صاحني انت صدک تقرا الفنجان ؟ بالبدایه خفت لایگول انت تمارس شعوذة لو من هالاشیاء ترددت وگلت خلیها علی الله وگلت اي استاذ !
_ د روح سویلي گهوه وجیبها ؟
_ صار استاد .
سویت له الکهوه هو یشربها مره مو مثلکم حلوه . 
_ دعوفک من عدنا ؟ کمل وبعدین /
 _ شرب گهوته وانطناني الفنجان وگللي شیگول ؟ چا ولکم هذا المدیر مو حي الله ؟ شگولن ؟ گلت والله استاد اکوش فد حرمه تحبک ؟
_ کال هاي معروفه ام الاولاد .
_ لا استاذ مو ام الاولاد ؟ فرد وحده موظفه چبیره .
_ والله لو تسمعک ام الاولاد ؟ الا تگلب الگهوه علی راسک ؟ .
_ وهاي الموظفة تفرح ویاک هسه ؛ بعدین تمل منک ؟
_ لیش إتمل ؟ شمسویلها ؟
_ استاذ هذا الفنجان ایگول ؟ موش آنه ؟ 
_ د کمل ؟ زین هالموظفه بیا طابق بالدائره ؟ 
_ هاي بغیر مچان؟
_ وین یعني ؟
_ تشتغل بدایره لوخ .
_ وشترید مني ؟
ابتسم بخبث قائلا : اشمدریني النسوان اش یردن استاد . اصبلک گهوه لوخ ؟
 المدیر کان بعد قراءة کل رساله تصله من العاشقه الولهانه ینادي علی ابو کریم لیفهم منه ما یخبئه الفنجان له وهل یتطابق مع ماقالته بالرساله ؟
_ هاي یومیة اشگد تاخذ ابو کریم من الموظفات ؟ 
_ کفیلک الحمزه استاد اقرالهن صحیح بس بعدین إیضحکن .
_ حتی لو بختهن مو زین ایضحکن ؟
_ شیسون من ظیمهن وراها یگولن کذب المنجمون ولو صدقوا .
_ اقرالهن البخت زین مو اتکأبهن ویلتهن بغیر شغلات علی الاقل یخلصن الشغل مالت الدائره ؟
_ یعني اگلب الفنجان واطلع چذاب یمهن ؟ لا استاذ لو اقرالهن من صدک لو ما اقری وابطل .

 
 .. کان عشق الاستاذ ( ز ع ) شیئاً لایصدق فیکتب لها اجمل الاشعار واحیاناً أمر علیه فیسئلني عن اجمل شعر بحجة أنه طلبوا هکذا اشعار من ابنتها بالمدرسة . خاصة أن خطي کان اجمل خط حین اکتب شیئاً ما . 
_ د هاک هاک شوف اشمکتوب بالفنجان من خزعبلاتک .؟
تناولها ابو کریم من ید المدیر العام .
_ آنه اقرا المکتوب استاد واشما طلع ما لي شغل ؟
 _ إذ اتسفط من عندک احسب نفسک یوم قطع راتب وتوبیخ ؛ واذا لا إللي اتگولهن صدک . یجیک کتاب شکر . الصدک ها ؟ دیر بالک ؟
_ فنجانک ملتوي هالمره .
_ ملتوي شنو ؟
_ استاذ کل إللي ترکض وراه تتعب إبلاش ؟ 
_ غیر رزقنا ونرکض وراه . هي هاي الحیاة .
_ لا استاد مو علمود الرزق .
_ علویش لعد ؟
_ تفتر وحده یمک ماتریدک من صدک . علمود هیبتها وبس .
_ من الموظفات ؟ 
_ هي نفسها هذیچ ؟
_ یا هي ؟
_ إللي بالمکان الاخر دا اشوفها نفسها .... تحوم تحوم وآنشاء الله ماکوشي ؟
_ تحوم ؟ کمل عوفک من کلمة انشاء الله .
_ ماتریدلک الخیر تتعب ویاها . 
_ ابو کریم مخصوم منک یوم قطع راتب روح بلغ مدیر الاداره .
_ مو تدلل استاد ؛ راتبي ولا حیاتک بضرر استاد . 
_ روح خلي الاداره یسوولک العقوبه حتی اوقعها .
_ ماتشرب چاي بعد ؟ 
_ د روح ما ارید .
ابتسم المدیر ( ز ع ) بوجه ابو کریم دون ان یراه . واغمض بطرفة عینه لي بعدم الامتثال لآمر العقوبه .
خرج ابو کریم من عند المدیر العام . 
_ ابو کریم من یجیکم سووله عقوبه بس ضموها یمکم ؛ گولوله صعدناها للسکرتیر مو تنطوه بیده . 
_ عقوبتیش استاذ ؟
_ اگولک عود صدک یحچي بالفنجان ؟ 
_ کل توقعاته صدک و لو ما یقرالي زین . یضحک من ایشوفني ؟ 
_ اشعجب ؟
_ کلت اشوف یعرف إلمن أحب بالدائره ؟ گال بعدین اگولک علی ام الشعر الاسود .
_ کلهن شعرهن سود وچم وحده صابغه .
_ بیني وبینک اروح اسئل ( علیه ) اگوللها خلي ابو کریم  یقرا فنجانچ . تضحک اتگول انت اتصدک بابو کریم هذا یتشاقه .
_ متروح تخطبها من أهلها واتفضها ؟.
ابتسمت عنده ثم خرجت .. 
 کانت توقعات العم ابو کریم القادم من الجنوب شیئاً لایصدق . فالمرأة التي کانت تدعي الحب ارادت توریطه بقضایا سیاسیه إخری ولکن طیبة الاستاذ ( ز ع ) و وقوف الله لجانبه انقذه منها ... والتحقیق معه لاحقاً اظهر برائته ثم تقاعده لیحل مدیراً آخراً مع فراشه الجدید محله .. ... 
_ وهسه ابو کریم ماراح تقرالي الفنجان ؟
_ لو تموت ؟ چان یحب علیه الگصیره وهي إتحب غیر واحد ..
خرجنا وعباس ینظر بعیني وانا ساکت هذه المره وهو یضحک علی کرم اخلاقه وطیبته .. وتوقعاته ...

............. 

انتهت ...
 اسعدتم اوقاتاً ..




















































































Reacties

مواقف رجولیه .. ضابط امن الدائره علاء الدین حسین مثال ... فاضل شناشیل 

في بدایة الثمانینات من القرن المنصرم کان بدائرتنا مدیر  اداره من اکراد السلیمانیه یمتاز بالنشاط والحیویه وطنیاً دون ان ینتمي لحزب او جهة ما اسمه فائق احمد . کان نشاطه غیر طبیعیا وکل المدراء یقدرون جهده بما فیهم المدیر العام ویبقی لساعات متآخرة بالدائره کونه مدیر اداره ومشرف علی کل شئ تقریبا من الموظفین والفراشین وسجلات الغیاب والسواق والسیارات والاثاث الی اخره . کان طیباً لدرجه کبیرة بحیث کنت وبعض الزملاء الظرفاء نعمل به مقالب ومن ثم یسامحنا علیه . 
اصدر مجلس الوزراء وقتها قراراً بتعیین المعوقین وذوو الاحتیاجات الخاصة بدوائر الدوله وشرکاتها . 
 جائنا شاب معوق اسمه حمد تم تعیینه بالاستعلامات والاستعلامات هي واجهة لاستقبال الزوار والموظفین والاشراف علی سجل الدوام الرسمي .
 لعدة مرات کان حمد یترک مکانه ثم یذهب لکشک قریب لشرب الشاي او لفة فلافل مما ترک فراغاً بواجهة الدائره وتسلل بعض الموظفین . 
انتبه المدیر فائق علیه ثم قام بتنبیهه وتوجیه  اللوم الیه عند الاستعلامات وقال له بالحرف الواحد : هسه اگدر اطلعک من الدائره ومتشتغل هنا اذا تعوف شغلک افتهمت ؟
_ آني متعین بآمر نائب رئیس الوزراء .
_ اطیح حظک وحظ نائب رئیس الوزراء ویاک افتهمت .!
 کان جالساً لسؤء حظ الاستاذ فائق بالاستعلامات احد ضباط الامن العام ؛ یبدوا أنه جاء لعمل ما . نهض من مکانه فسئل المدیر فائق 
_ وین غرقة ضابط امن الدائره ؟
_ اول طابق تصعد فوک علی الیسار غرفه استاذ علاء 
والحقیقه ان صفة ضابط امن الدائره هو لیس  ان یکون مرتبطاً بجهة امنیه انما درجة حزبیة من خلالها یعرف ضابط امن الدائرة جمیع الموظفین . والاستاذ علاء الدین حسین للامانة الاخلاقیة کان اروع انسان فوق ما یتصوره العقل اولا لانه ابن عائلة محترمه من المنصور ومن البغدادیین القدماء الاصلاء من بیت القاضي ؛ وکلما کنا نزوره بالبیت یقول والده ( الاخلاق هي السیاسه ؛ السیاسه ماتسوي اخلاق ؛ دوم آوصي علاء ابني اگول تروح حکومات وتجي حکومات بس الاخلاق اذا راحت مترجع بعد ) کان یجلس علی کرسي مخصص له وطراز بیته اشبه بالبیوتات القدیمه وامامه منضده للشاي و الباب الخشبي البغدادي ندخل منه الی حیث زوجته ام علاء تعمل لنا عصیر الرارنح بعد قطفها من الحدیقة ... مررنا یوماً ببیت هاشم النجار بالدهالیک بالکریعات کان مریضاً فوجد الاستاذ علاء الدین ببیته صور اهل البیت علیهم السلام فسئله ضاحکاً 
_ هاشم اشو ماکو صورة السید الرئیس ؟
رد هاشم ضاحکاً : 
_ ولک د اسکت لایسمعوک ؟ اترید تبلینا ؟ 
 ضحکنا کلنا ولم یحمل علاء الدین ضغینة او سؤءاً لاحد انما کان یتغاضی وکآنه لم یسمع شیئاً . کنت احیاناً أمازحه بالسیاسة بالنکته یرد مبتسماً 
_ ولک د اسکت اترید تبلینا انت اللاخ لایسمعوک ؟ یبدوا انه حفظ کلام هاشم النجار ...
ماذا حصل بعد ان سمع ضابط الامن کلام استاذ فائق .؟
 دخل ضابط الامن علی الاستاذ علاء الدین حسین لیعرف نفسه اولاً ثم یسئل عن المدیر فائق الذي تجاوز علی نائب رئیس الوزراء بالسؤء .
تم استدعاء حمد عند الاستاذ علاء الدین بحضور ضابط الامن ومن ثم  تسجیل اقوال الاستاذ فائق وبعدها صعد ضابط الامن الی المدیر العام فتم اعطاء فائق اجازه لیومین لمعرفة ما ستؤول الیه الاحداث . وبعدها استدعائي ضابط الامن وبعض المقربین من مدیر الاداره لمعرفة ما ان کنا قد سمعنا شیئاً . 
حاول الاستاذ علاء الدین حسین ابعادنا من التحقیق الا ان اصرار ضابط الامن القادم لمعرفة المزید  حال دون ذلک ... واول سؤال سئلني أن کنت قد سمعت شیئاً قبل هذا الکلام ؟
 _ استاذ لو اتگول علی اي شخص ممکن اصدگک ؛ بس استاذ فائق هذا انسان طیب ماعنده هالسوالف بالعکس یبقی میروح للبیت العصریات من یرجع المدیر العام للدائره باللیل ایگوم یلزم الصونده ویرش الرصیف واشلون ایگول کلام مو حلو .
_ قصدي انت سمعته مثلا فد یوم کال علی الحکومه شي ؟
_ دا اگوللک ایرش باب الدائره بالصونده ؟ یا مدیر ادارة ایسویها ؟ بکل دوائر الدولة ؟.
بان اساریر الفرح علی وجه الاستاذ علاء الدین حسین ضابط امن الدائره  الذي حاول جاهداً تخلیص الاستاذ فائق . لکن ضابط الامن الدوله رفع الاوراق لجهات علیا . 
 غاب فائق احمد من الدائره لیقضیها سنتین بسجن ابو غریب حکماً علی تسرعه ودون ان یعرف من هو رئیس الوزراء ومن هو نائب رئیس الوزراء فالرجل بعید کل البعد عن السیاسه . 
 ان ما احببت ذکره هو موقف الاستاذ علاء الدین حسین ضابط امن الدائرة ومحاولاته ان یبعد الاذی عن الاستاذ فائق لکنه لم یفلح . وکل مافعله والخیرین هو الادلاء بشهادات حسن سیرة عن الرجل . 
عندما خرج  فائق احمد من السجن تم اعادته مدیرا لاحدی الدوائر بنفس وظیفته وهذه المره رأیناه فوق المنضده واقفاً یسهل امور المعاملات للناس فخرجنا انا وهاشم نضحک وقلنا : مو حرام هذا ینذب بالسجن من ورا حمد التافه ؟ شوف اشلون یکتل نفسه ویشتغل ومیهمه وکته المهم یرضی ربه والناس ...
الف تحیه للاستاذ علاء الدین حسین  اینما کان ابن الاصل والاصول لم یحب احداً ان یتآذی رغم مزحنا الثقیل بالسیاسه وقتها ... لابد ان نذکر افضال الاخرین والا نکون

حرام زاده ..



 اسعدتم اوقاتاً ..........

 




























Reacties


العم انور ابو البنات بمحلتنا ..... فاضل شناشیل 
بمحلتنا القدیمة نهایات الستینات وبدایة السبعین من القرن الماضي کان یسکن العم انور وله عدد من البنات ؛ کان کثیر التمنی ان یرزقه الله بولد بعد هذه الجوکه من البنات . حتی وصل عددهن بحدود العشره علی ما اظن . عند البنت الرابعه لم یتمنی شیئاً قال 
_ إللي الله یجیبه الحمد لله . خلص رضیت بقسمته .
ولآن زوجته کانت جمیله جداً فکان یضحک بوجهها قائلا : علواه لو کلهن یطلعن مثلچ حلوات . وفعلا کانت زوجته تحبل ببنت جمیله واذکر منهن الانسه ( دجله ) کانت من الجمال الرباني والعین الوسیعه وهي صغیره یسر الناظر ان یتمعن في صنع حلق الله .. 
کانوا یقولون علیه ابو البنات مرزوق . ورزقه معه . حتی رزقه الله اخیراً بولد جمیل الشکل یشبه والدته ایضا .. بعد طوال هذه السنین جاء الولد فکان یخاف علیه کثیراً و اخواته کانوا اکثر حرصاً علیه من کل شي . اسماه ( م ) راضیاً بحمده . ...
سمعنا بحادثة دهس عند نهایة شارع الکیلاني الرابط بین الشیخ عمر والکفاح قرب منطقة الغزالي التي کانت تعج بسیارات الحمل وکذلک الباصات الخشبیة التي تنقل الفلاحین لبلدروز وبعکوبه وتیل تاوه ( الخالص ) وشهربان ( المقدادیه ) وغیرها ؛ المهم ..
ذهبنا لمشاهدة ماحصل واذا بسیارة الزبل التابعة لامانة بغداد قد اقترب من سیارة حمل ( لوري ) آخر نوع فالفو خشبیة واثناء الالتفاف لم ینتبه سائق السیارة بوجود شخص مابین السیارتین ثم دهسه واقفاً مما تسبب في کسر الرأس والصدر والدماء تسیل علی السیارتین من شدة القوه . عرفنا بعدها انه العم انور والد البنات الجمیلات . بدآ الجمیع بالصراخ والعیاط والبکاء ومنهم من تآثر بشدة بسبب بشاعة الموت الذي تعرض له العم انور .



نساء محلتنا فیهن من کانت تشفق علیهن ومنهن من کانت تقول : داده شوفي کصة یاهي منهن مو خیر ! والاخری تقول ( عاف کوم بنات ؛ منو راح ایعیشهن ؟ ) ومن الاقاویل الاخری الا ان الکثیرات من طیبات محلتنا من النساء کانن کالاخت والام لزوجة المرحوم انور . فتقدمن لخطبة بعض البنات وتزوجن من اجل تخفیف العبئ علی ام دجلة . 
بعد مطالبات وکتابکم وکتابنا ومراجعات المسکینه ام دجلة لدوائر الدوله وامانه بغداد من اجل تعویض دم زوجها . جائت الموافقه بالتعویض بعد مرور عشر سنوات علی وفاة العم انور وبتعویض قدره عشرة الاف دینار . فرحت ام دجلة بهذا المبلغ ولکن هذا لن یعوض ابو دجلة الحنین الودیع المسالم اطلاقاً ؛ کانت نساء محلتنا یقولون لها . شنسوي داده الله یرحم انور . البرکه بالبنات وابنج المحروس الله یحرسه . .
الولد الصغیر کبر وتعلم الغناء واراد ان یکون مشهوراً علی الاقل وهو بحاجة الی المال من اجل تسجیل اسطواناته والان جاء المال وجئن البنات کلهن للمطالبة بحصة والدهن ؛ وبدئت حیرة الجمیع .. فالبنات من حقهن التعویض لاسیما انهن یعیشن فقیرات الحال والمتزوجات منهن ایضا طالبن بالتعویض من هذا المال . 
جلست الام لتتشاور مع البنات لیتخذن قراراً صعباً باعطاء المبلغ کله لاخیهم الصغیر بعینهم والکبیر حالیا الذي سیکون ربما مشهوراً بالغناء ثم یعوضهن لاحقاً اذا غنی بالبارات والملاهي وربما التلفزیون والاذاعه .أو لربما سیفشل بالغناء ویخسرن تعویض سنوات والدهن .. .
الامر الان کما یقول هو باغنیته ( لو تحب لو ماتحب هي وحده من اثنین ؟ ) ..
تم اتخاذ القرار النسائي العظیم بالتنازل بکل المبلغ لاخیهن .
تحیة لتلک النساء الاخوات والام الحنونه اللاتي وقفن تلک الوقفة الشجاعه وهن یخاطرن بهکذا موقف ومبلغ کبیر ....
اتمنی لهذا المطرب المشهور الطیب ان لاینسی هذه الوقفة من اخواته ... 
بالتآکید عرفتموه ... 
انه من محلتنا القدیمة بباب الشیخ برصافة بغداد ...
........

مساء الخیر 



















Reacties

سعدي الحلي والوزیر وعلاوي .... فاضل شناشیل 
 سعدي الحلي غنی باحدی الحفلات الشعبیة وکعادة المطربین حین یحبونه جمهوره یشید الیهم بالاغنیه فقد حصل ان غنی الکثیر بالحفلات الشعبیه ویشید أحدهم بإسم صاحب الحفل او العرس ثم یمدحه بالغناء وبعدها یقوم صاحب العرس باعطائه مبلغاً من المال لانه ذکره اثناء الاغنیه وکانت هذه شائعه بالعراق الا ان حفلات الاذاعه او التلفزیون یخلوا منها هذه الاسماء المضافة .
وسعدي الحلي یبدوا ان حظه العاثر قد غنی وامتدح علي ( علاوي ) باحدی اغانیه بمنطقه ما  فاستطاب له الجمهور ففیهم السکران والخدران والمرتخي والمنتهي طرباً علی صوت النغمات والموسیقی وطلبوا منه اعادة المقطع ولان اسم علي یکثر بالعراق وفي الحفل عدد من الاخوه یحملون اسم علي فمال البعض تحبباً او تودداً علی صدیقه علي یلاطفه ؛ وسعدي الحلي انتبه علی هؤلاء ( المفرفحین ) غنی اغنیته فطلبوا منه اعادته ثانیه لکنه غنی لهم اعنیة اخری .. 
 اشتهرت اغنیه ( علاوي یاعلاوي ) واطلقوا النکات علی سعدي الحلي الذي لم یسلم من تعلیقاتهم فاتضح لهؤلاء استطابتهم لهذه الاغنیه وتم تسجیلها بالکاسیتات وزاد الاقبال علیه . استمرت التعلیقات واطلاق النکات بحق سعدي الحلي بکل ارجائ العراق حتی وصل للاخوه المصریین الذین یعملون بالعراق وهم خائفین من سعدي ان لایتقرب الیهم .
 کان سعدي الحلي حذراً حتی بملبسه فاذا لبس العگال تجد النکات ثاني یوم حول حبه لشاب صغیر یسئله عن العکال . واذا لبس القاط ابتلي علی عمره فیتورط باعة القوط وهم مبتسمین لهذه النکات علیهم . احتار اش یلبس . من یطلع من البیت یتشاهد بس لا واحد ایشوفه وایسوي علیه نکته . راح گعد بالصالحیه یم الگهوه حتی بلکت ایحسن سمعته ویغني بالاذاعه . بس محد ایقبله والکل یضحکون بما فیهم محمد سعید الصحاف مدیر الاذاعه . ... 
 اثناء الحرب المدمره بین العراق وایران کان لابد من مشارکة المطربین بشحذ الهمم و الاغاني الحماسیه للجنود المرابطین علی الجبهات ؛ والمطربین یبحثون عن رزقهم وشهرتهم من خلال دخول الاذاعه . وافقت الاذاعه علی دخول سعدي الحلي لیغني ولکن نکات الشارع لم تتوقف اطلاقا . 
 حضر سعدي الحلي الکثیر من الحفلات وکان جالساً عدد من المطربین وما ان یقول لهم سلام علیکم حتی یبتسم الجمیع بوجهه فیردهم ( ابشرفکم سمعوني آخر نکته اشگالوا بالله علی ابو خالد ؟ ) فیضحک الجمیع ویخبروه بما سمعوه . کان حذرا حتی بالسلام علی الناس لان ابتساماتهم وراها خبث ونکته . قال لهم ( اشو استاذ یوسف عمر من غنی مات اللمبجي محد گال شي ؟ بس اني ابتلیت بعلاوي ؟) ضحکوا قائلین ( مو هذا استاذک الچبیر ) ..
_ا لعن ساعة السوده وساعة علاوي وجهرة علاوي .. عفتوا کل الاغاني مالاتي و لزگتوا بعلاوي ؟ ...
_ زین لیش ما اتغني بس سب علاوي هالمره ؟
_ آني بلا علاوي ما خلصان , هالمره یبلوني بیه من صدک .
في حفل تکریم الفنانین کان هناک  هدوء بالقاعه بحضور الوزیر لطیف انصیف جاسم وزیر الاعلام لیقدم ویکرم جمیع المطربین .نودي علیهم واحدا بعد الاخر حتی وصل الاسم لینادوا علی سعدي الحلي . ابتسم الجالسین وقد احس بهم فلم یقل شیئاً حتی وصل للمنصة لیستلم هدیته من الوزیر وما ان رآه لطیف انصیف جاسم ابتسم ابتسامة عریضة فقال سعدي الحلي للوزیر بصوت واطئ ( والله سیدي کلها دعایات ) ..
ضحک الوزیر باعلی صوته والقاعه یبتسمون ربما یختلقون نکات اخری علیه الان ... 
وعند وفاته لم یسلم منهم بطریق العوده  بالسیارة احد المعزین قال اللهم احشره مع الانبیاء والصدیقین وخاصة نبي الله لوط .. ضج الجمیع بالضحک ....
وین ایروح بعد ؟ ...........

مساء الخیر














Reacties


تراثیات ... سوالف بغدادیه ... فاضل شناشیل 
شفته اشلون طفر مثل العگرگه ؟
_ منو ؟
_ ذاک ابن الطایحه البخت ؟
_ أشلون شفته ؟
_ متچلبغ فوک التیغة مثل الشادي .
_ ابن سنیه ، مو ؟
_ أشمدریني إبن یا طایحة البخت .
_ تعال ولک تعال ؟ لاتخلیني اهفک بالیمني انزل ؛ انزل دا اگولک ؟ اه ؛ ولک مو ویاک ؟ 
_ بالله هسه لو یوگع لو ینتل بالکهربا احد هماتین ایگول لیش ؟ 
_ إشصعده علی التیل ؟ 
 _ مناک مناک من یم الچینکوات مچلب بالتیل ؛ دگول همزین المزریب اشویه قوي والا چان اتزحلک وراح قربان .
_ هسه هسه بلکت یجي مامور البلدیه وایشوفله چاره .
_ ماکو چاره غیر ادک بابهم بلکت اینزلوه للمچلوب ؛ اشصعده ؟ ما ادري اشوداه لیفوک مادري والله .
_ خیر عمو هادي شکوش ؟
_ شکوش ؟ مدتشوفه للمچلوب اشلون صاعد من فوک التیغة علی التیل ؟
_ وینه ؟
_ هیانه دعاین عاین .
_ هاي جاکیت وزبون من البارحه مچلب بالتیل .
_ زبون شنو ؟
 _ البارحه ام سعد متدري بالهوی یا اتکول طار زبون ابو سعد وچلب بالتیل ورادت اتجره بالعوده اتکول خفت .
_ وک دشوفه دیتحرک ؟ شنو زبون شنو عربون ؟
_ مال الهوا یتحرک . معلیک دعوفه هسه .
_ ایصیر عیوني بیهن تراخوما ومدا اشوف زین ؟
_ ما بیهن شي عمي هادي . بس هذن چعب استکانات بدلهن یم افرام بالجاده .
_ افرام الحنقباز ؟
_ مو هو راح ایکولک مناظرک بدلهن .
 _ خلي ایولي ؟ وک اني اشوف الطیر نثیه لو فحل بالسما اتریدني اروح یم الحنقباز افرام علمود یخلیلي جعب مرایه لوخ . د روح .
_ اذا زبون سویته جاهل لعد افرام اشلون ما أتسویه حنقباز ؟
_ چراخ. چراخ سچاچین چراخ، چراخ سیوف چراخ ؛ چراخ خنچر چراخ . چراغخ .....
_ اي عمي هادي اچرخ زین ومعلیک بزبون ابو سعد .
_ د روح علی شغلک خلي اشوف دربي .
......
_ اشبیه هادي ؟ 
_ ثبر الدربونه .
_ علویش ؟
_ عباله جاهل فوک التیل .
_ ابن من ؟
_ زبون معلک .
_ حجي زبون ابو التکان ؟
_ روح یم هادي خلي ایفهمک وحد سچینتک یمه مالي قرصاغک .
_ لازم ابو نعیم مانطاک الیومیه ؟
_ ابو نعیم هاي عوایده مو جدیده علیه .
_ اشو الاوتیل قلبالغ وخري مري خاشین ناس وطالعین ناس علویش مینطیک یومیتک ؟
_ ایگول خلوني بس اسوي گبة لوخ فوک السطح وبعدین تجیکم خرجیتکم .
_ شنو هالگرمیده ؟ دخلي ایلعب ایده اشویه ؟ چان اتگوله اشناکل حو ؟ لو صخام اتصخم بیها وجهک ؟
_ صخام الصخمک متگولي اشبیک ؟ 
_ ما ادري اشبیک ! دا اکولک علی عمو زبون اتگول معلک !  والرجال هذاک هو بالتکان دا اگولک علی هادي اتگول سجینه مدري خنجر ؟ متگوللي اشبیک ؟.... مگلتللي اشبیه ابو نعیم ؟
_ گال بلکن تلگي واحد امین علمود یلزم الاوتیل ؟ 
_ إللي ابصف الدفاع ؟
_ أي بس مو أتطوطح بالشرب اخاف یطلع الزعیم وایدوسک بسیارته . 
 _ ولک هذا الزعیم ابو الکل . بس ایشوفني یوگف من کیفه . علی راسي هو وسیارته . ... اشلون حچي هذا ؟ ولک الزعیم میدوس علی نملایه هالمره ایدوس علی ابو شهوبي . عوفنا هسه ایریدوني اشتغل هناک لو لاع ؟
_ عدل عصفوریتک ومو تشرب هوایه روح له من هسه .
_ خلص ؟ موجود اگبالک العامل الجدید .
_ شغل یمه متعب ترا ؟ لیش اتگول بعدین ؟
_ إشیرادلها ؟ چم کلمه هلو بالانکلیزي وهلو مسسز ویس وآیام رشید اند یو ؟.. هي هاي هیه میرادلها شي .
_ من تروح یمه اخذ ویاک چم صوره .
_ صورتیش ؟ شمسیه ؟
_ لا ؟ ابو نعیم ایحب صور هند رستم ولیلی مراد وبدیعه واسمهان . 
_ آني هماتین اموت علیهن وعلی صورهن .
_ د روح لعد بالعجل مو إتطوطح یمه ؛ اشویه رکز من توکف . 
_ إبشرفک ؟ إبداعت جهالي خو مو تتشاقه ؟
_ علویش اتشاقه , انت اترید شغل د روح یمه . 
_ اذا طلع مو صدک ؟ یابه وشرفي اخلیک جوا چرخ هادي وإیچرخک . 
_ ودیله ویاک عرک .
_ لیش یشرب ؟
_ أتعلم صار شهرین .
- إیا ملعون الوالدین ! هذاک الیوم شفته رایح للمعبد ویا الحاخام دیسولفون ؟ ... ایجوز تاب ؟
_ لا میتوب . بس یعلم الحاخام علی الشرب هماتین . 
_ صدک نچر ؛ اشهد ما بالله نچر اخو نشمیه .
_ نشمیه ماعدهم هذول الیهود . سلیمه سلمی ابتسام بسمه من هالاسامي .
_ نچر والله اخو لمسه .
_ بسمه بسمه مو لمسه .
_ اعرف لیش شنو عبالک اني سکران؟ .. لعد آني لیش من اشرب ؛ الملا یگلب چهرته ؟
_ مو الحاخام یشرب ویا الاکل الملا ایگول ویا الاکل اذا تشربون ایسوي دود .
_ لیش العروک مو زین ویا العرک ؟
_ د روح روح بالعجل ...
_ کلت الاوتیل وین صایر بهذاک الصوب ؟ 
_ الدفاع بهالصوب لو بذاک الصوب ؟ .. اشلون ما اشوف راح اتخش للدفاع .
_ هسه اروح .. ها . أها . خلي انشوف دربنا .. کلت اشبیه عمي زبون ؟
_ زبون مابي شي معلک علی التیل بس د روح .. 
............


نهارکم سعید  ........




















































































Reacties

روی لنا الاستاذ عیدان بالابتدائیه حکایة انه في یوم من الایام سرق هدهد حبة من بیت نملة ومن ثم اصابه داء لم یشفی منه فقد اختنق وحاول ان یشرب من میاه دجله والنیل لکن بلا نتیجه فالحبه مازالت برقبته حتی وصل الی الملک او النبي سلیمان الذي یتحدث مع جمیع الحیوانات فشکی امره .وامر هذه الحبه الی اخره .. ونحن صغار نستمع للمعلم عن هذه الجریمه الکبری علینا ان نتعظ ولایسرق احدنا مقطاطه احد او مساحه احد او المسطره . وبعد ان اکمل الدرس اعطانا من شعر احمد شوقي هذه الابیات قال لنا احفظوها غداً ولازلت لحد الان اتذکر کیف وقفت بساحة المدرسة واردد في الصباح .. 



وَقَفَ الهُدهُدُ في با بِ سُلَيمانَ بِذِلَّه  قالَ يا مَولايَ كُن لي عيشَتي صارَت مُمِلَّه 
متُّ مِن حَبَّةِ بُرٍّ أَحدَثَت في الصَدرِغُلَّه لا مِياهُ النيلِ تُروي ها وَلا أَمواهُ دِجلَه
وَإِذا دامَت قَليلاً قَتَلَتني شَرَّ قتلَه فَأَشارَ السَيِّدُ العالي إِلى مَن كانَ حَولَه 
قَد جَنى الهُدهُدُ ذَنباً وَأَتى في اللُؤمِ فَعلَه تِلكَ نارُ الإِثمِ في الصَد رِ وَذي الشَكوى تَعِلَّه 
ما أَرى الحَبَّةَ إِلّا سُرِقَت مِن بَيتِ نَملَه إِنَّ لِلظالِمِ صَدراً يَشتَكي مِن غَيرِ عِلَّه ...
..........

 المعلمین الاوائل کانوا مجدین باعطاء الدرس مع الشرح الوافي والکافي للتلامیذ الصغار . لازلت لحد الان اردد وقف الهدهد بباب سلیمان بذلة ... 
اتمنی بعید المعلم هذا ان یبدع المعلمون والمعلمات ولایلتهوا بموبایلاتهم .. 
اذا کان خیراً ومعرفة بالموبایل استفاد منه اما  الرکض وراء الاسماء الوهمیه والغرامیات والحبیات لمن تحمل اسم امرإة فتآکد بانه رجل لیس الا . .
 من منکم یتذکر هذه القصیده یاتری ؟



Reacties

بغدادیات .. الحظ التعیس بشباک الجارة سمر ..... فاضل شناشیل 
قالت زوجته نعیمه اني رایحه لبیت اهلي فد یومین .
قال  في قراره نفسه ( واخیراً الحمد لله فرصه لکي اتصل بصدیقتي فلانه من اجل ان تآتي للبیت فلا احد بالشقه . هي ستذهب لبیت اهلها ویخلو الجو ) ولکن ...
 یجب ان اسرع لشراء الشمبانیا اللذیذ فهي لاتسکر انما تنعش الجسد ونحن في غمرة اللذه . لابد ان اتصل بها بس منتظر اودع زوجتي ..
_ حبیبتي مو تتاخرین ابیت اهلچ ؟
_ صایره هوایه ما شایفتهم یومین کلش کلش اتلت ایام وارجع .
_ عود خابریني من توصلین لکراج العلاوي .
_ اخابرک من بیت اهلي عود اگوللک اشوکت اوصل لبغداد .
_ زین حبیبتي .
تمنی ان تطیل اقامتها ببیت أهلها لعدة ایام وهو بحاجة الی الجنس اکثر من اي وقت  فلابد ان یغیر مزاجه و منهاجه ولو قلیلاً . ... بعد ان حمل حقائبها اوصلها لکراج العلاوي مودعاً ..
_ اییه الحمد لله .. راحت ... 
وین ارقام التلفونات ؟ لگیته وینچ مریم مریم .
رفع سماعة التلفون من الکشک الموضوع خارج البنایه وضع قطعه معدنیه من ال255 فلس لیتصل بمریم .. لاترد . شنو القصه ؟ معقوله مو بالبیت ؟ جبت شمبانیا وباکیت جکایر . خلي ارجع ماکو فایده .. 
اثناء الصعود بالعماره کانت جارته تحت بطابق تنظر الیه . من خلال فتحة الباب .  انه الجار سعید لوحده یصعد سلالم العماره .فکرت مع نفسها ماذا لو طرق الجار بیتها بحجة طلب کبریت او قلیلا من البهار او راس بصل ؟ ماذا لو ؟ 
شیصیر هسه لو ایدک الباب ؟ بس هاي مرته بلوه سوده ؛ خلي إتولي وجه البومه . .
 صعد سعید لشقته اورث سیکاره وتناول کاسا من الشمبانیا لوحده فتح الرادیو لیستمع لام کلثوم من صوت العرب من القاهره .
ایه هسه لو وحده یمي ؟ بس منو ؟ الاحسن اطلع افتر میفید الکعدة ؛ بلکت اشوف وحده بالشارع اغمزلها وتغمزلي . .. حل الظلام عائداً لشقته فسمعت جارتها طقطقة صوت حذائه نظرت بعینها الیه من خلال فتحة الباب . وهي تتمنی ان یطرق الباب . 
 في الیوم الثاني تذکر انه کان علی علاقة بواحده من النساء بحث بین الاوراق عثر علی رقم تلفونها فاتصل بها . لم یکن احدا هناک لیرد . وین صارت هاي اللوخ معقوله الخاتون طالعه ویا غیر واحد ؟ یلا .. لیش هو اني مالکها ؟ هي حره . ایجوز متزوجه . اشمدریني . بس هاي گبل گالت ما احب الزواج ؟ لعد لیش مترد علی التلفون ؟ ایجوز طالعه ویا افندي لاخ ؛ دایخ مثلي . ... دخلي اشوف بالدفتر اکوش رقم اخر .؟ والله دخت .. تالیها اشلون ؟ 
اطلع من الشقه اروح یم محلة الذهب  هناک اکوش بنات بلکت والحظ اجیب وحده للبیت . . لم یجد احداً بهذا الجو الممطر بالمحله عاد لبیته ؛ وجارته احست بأن لاصوت باعلی الشقه یبدوا ان زوجته خارج المنزل منذ یومین ف نظرت بالصدفه من شباک البیت للشارع وجدته یهم بدخول العماره اسرعت للمکیاج ثم وضع قلیلا من الحمره الغامقه علی شفتیها وتحت عینیها قلیلا من الکحلة السوداء وتعطرت ثم اسرعت للباب لتفتحته بحجه ان تسئله بلا زحمه ابو الغاز ما شفته ابدربک ولربما ستغریه بالکلام وحلو الحدیث وتجرجره بمواضیع اخری ثم تغویه وتشتهیه .
فتحت الباب فوجدته قد صعد لشقته وهو یهم بفتح باب الشقه . یا لتعاستي وسوء حظي ؟ هسه وکت مکیاج چان ؟ لو وکت هاي الحمره الطایحه الحظ بالگوه لگیتها ؟ بلکت ینزل فد اشویه لوخ . خلي انصي التلفزیون اشوف شیسوي ما ایسوي ؟ زین بالله لو اني اصعد یمه واطلب منه یجي ایشوف میزانیه الکهرباء بحجة ماکو کهرباء وصار فیوز شیصیر ؟ ... ها ؟ لا لا . خاف یجي احد من اصدقاءه یمه بهالاثناء وبعدین انفضح . لا الاحسن هو ینزل . اي هو ینزل بدل ما اني اصعد له . دنیا مو آمان . اي کلشي ایصیر . لو احد من الجوارین فوک ینزل ویسئل لو ایشوفني هاي المصیبه ..


 
 ... بحث سعید بین اوراقه القدیمه لربما یتذکر احدی صدیقاته ویتصل بها غرامیا ثم یدعوها للبیت من اجل قضاء وقتاً ممتعاً معها .. جارتها تسمع انه یحاول الاتصال من بیته ولکن مع من ؟ ایجوز انه یبحث عن ضالته الجنسیه ؟ ربما . طیب لأتحضر من الان واغیر ملابسي لربما یقف قلیلا عند ممر شقتي وافتح له الباب .
خرج مسرعا وبخطوات سریعه نحو الخارج نظرت الیه من خلال فتحها للباب قلیلاً وهو یهم  بالنزول سریعا .. لابأس سیعود ؟ وین ایروح ؟ الیوم مابیها مجال بعد . عین علی الشباک وعین علی الباب . اکول ؟ لیش ما البس النفنوف الخفیف ؟ مو یغري إشویه ؟ لو ذاک اللاخ اللي اشتریته من شارع النهر ؟ ای هذاک احلی احمر وشفاف وبیهن وردات خفیفه والبس الستیان اصعده اشویه بالشد ؛ هذول الریاجیل یدوخون من ایشوفون الصدر صاعد لیفوک . ...
رجع ؛ ایه رجع ؛ !  دا اسمع طقطقة حذائه خلي افتح الباب . فتحت الباب لتتفاجئ به وهو یحمل جنطة زوجته العائده وعینیه لم تسقط من هذا الجسد المغطی بأخف قطعه قماش وسبحان من خلق وسوا . وزوجته معه تنقنق اشلون وضعیه مطر دک . هاي شنو ؟ ! هاي اشبیها اتخبلت جارتنا طالعه مصلخة بهالبرد ؟ 
لم یقل شیئاً لقد ضاع منه یومین من حیاته بالبحث والعناء .. یا لتعاستي وسوء تفکیري ..

اغلقت جارتهم الباب بقوه بوجه الحظ التعیس ...



من قصه جارة الحب کتبتها عام 1985 ببغداد ..
 اسعدتم مساءاً ......



























Reacties

البحث عن الغنی وسط الدموع قصه حب .... فاضل شناشیل 
_ تگدرین اتودین الرمان إلها ؟
_ صار لک ساعة إتفلس بالرمان وتالیها اترید اودیها إلها ؟
_ معلیچ د ودیها أنتي .
هذا مو مخبل یگعد النهار کله ایفلس رمان وایکشر حب إلها ؟
هکذا کان یحب امیر نوال تلک الفتاة الوجه الدائري والشعر الاشقر بمحلة ألبو اقلام بالکراده ..
_ محبتچ من الله .
_ بس دتعاین علی البنات .
_ من وراچ .
_ علویش من وراي ؟
_ لان کل ما اباوع علیهن ما الگي احلی منچ بیناتهن .
_ هاي ویا کل وحده إتگول هالحچي ؟
_ والله صدگیني نوال فلا شفتج احلی منچ . تدرین حتی حبات الرمان احسبهن ؟
_ صدک تحچي ؟
_ والله وکل حبه رمان اجیب اسمچ اگول یاحبه وین ماتنزل علی شفایفها بمکاني بوسها .
_ انشاء الله تحسب حب الشمس هماتین ؟
_ نوبات اتیه بالحساب . بس اخر حساب چان ستمیه واربع وثلاثین حبایه .
_ اشلون خلک ؟
_ علمودج غیر . حتی لاتتعبین .
_ هیچي أتحبني ؟
_ واکثر وعیونج .
_ اگولک ؟
_ گولي ؟
_ مو مثل هذیچ المره أتصعدني بالعربنچي ؟
_ لا ولا خلص بعد وفضحنا الحصان ظل واگف ابنص الشارع ونضحک میرید یتحرک ..
_ من فدوه لضحکتچ ؛ اتمنی هسه لو افلسلچ الدنیا کلها . 
_ د روح روح خاف ایشوفونا . 
بعد ان توطدت العلاقة بین نوال وامیر أحست ام امیر بتلک العلاقة بین ابنها وبین نوال  هذه البنت التي تعشق حتی مشیة امیر وحفظت کل ملابسه من البنطرون القهوائي الی القمیص الشکري الی لون حذائه حتی قصة شعره فهي تعرفه حق المعرفه .. 
ذهبت الی باب المدرسه وبکل عنف صفعت تلک الفتاة .
 _ سمعي ولچ ؟ اتعوفین أمیر أحسنلچ ؟ متعوفیه ترا والله اخلي کل الکراده ایعرفون بیچ ؟ یومیه ماخذته ومهزومه ویاه علی ابو نؤاس .
_ لیش أني شمسویه ؟
_ ممسویه شي بس حب وبوس واشمدریني شکوش بعد ؟
_ عیب خاله هالحچي ؟
وبضربة کف علی خدها تلقتها نوال  من ام امیر بباب المدرسه والبنات صدیقاتها ینظرن إلیها و لوقاحة هذه المرأة التي تجاسرت ثم ضربت نوال کونها تحب ابنها امیر .
ردت صدیقاتها .
_ لیش ما ردیتیها ؟
_ لا . عیب . ابگد امي . میخالف .
_ شتسوین بهیچ حب ولچ ؟
_ میخالف لخاطر امیر . امیر یحبني .
 کانت ام امیر من النوع المادي الذي یحب ان یفترن ابنها باحدی العوائل الغنیه وبالفعل عثروا علی بنت لابنهم امیر الذي اصبح فیما لاعباً مشهوراً . وتزوج امیر من سعاد الغنیه التي تسکن قرب الارخیته .. 
بقیت نوال  تعیش علی هامش الذکریات کلما تنظر الی حبات الرمان وکیف کانت تتهرب لحظات من المدرسه لیدلفوا الی الازقة الخلفیه للکراده خارج وکم کانت جلساتهم جمیلة عند مطعم ابو سعد حیث یتناولون الکباب معا . 
 احس امیر بالندم کثیراً . فالمال لیس کل شي بحیاته . صحیح انه الان یمتلک سیارة بفضل أهل زوجته ولربما طمع بإن یکون لدیه بیتاً ایضا من ضمن ورثة أهل زوجته مستقبلاً ؛ لکن هذا لن یعوضه الحب الذي کان یعیشه مع نوال تلک الشابه الجمیله الشقرائ الشعر واللطیفة المعشر . لابد ان یعود إلیها ویتقدم لخطبتها حتی ولو کان بالسر فهذا لایهم ربما بالمستقبل سیشرح لزوجته هذا الامر . ..
ماذا لو عرف بیت عمي بإني تقدمت لخطبة نوال ؟ ماذا سیفعلون ؟ 
_ أکید هذوله راح إیعیروني وإ یکولون أنت کلشي ماچان عندک مو زین سویناک ؟ وشسوي ابفلوسهم ؟  آني هسه لاعب طوبه واعرف اشلون اتصرف . بس بالاول خلي اروح اجس نبض بیت اهل نوال اشوف شیکولون . 
تقدم امیر لخطبة نوال  ولکن والدها احس بالموضوع وعرف ان ابنته سبق وأن کانت علی علاقة مع آمیر ؛ لکن امیر غدر هذا الحب وظل یبحث عن زواج مصلحه تفیده . فرفض ان یعطي ابنته لامیر 
_ والله رایدها ولد عمها .
_ عمي آني جاي و راید بنتک بالحلال .
_ جربت قسمتک وبنتي مو مثل الجماعه زناکین .أحنا ناس علی گد حالنا ؛  هاي د اتشوفني اشتغل یم واحد بالرشید بالاختام مستوره والحمد لله 
_ یا عمي ترا والله الشغلة صارت من أمي و لگت هالبنت إللي .
_ إي وشنو ذنب بنت الناس ؟ .
_ عمي الشرع حلل ..
 _ لاتکمل ؟ عوفک من الشرع . الشرع ایگول من جنت اتحبها چان تجي وتخطبها وشوف إشلون الله یرزقک . مو رحت انت وامک أتدورون وین ماکو ناس زناگین أتدگون بابهم .. الله ویاک ابني . بنتي مو قسمتک . قسمة ولد عمها ایکون .
أنسحب امیر خائباً  وهو یحدث والد نوال عند ناصیة الشارع ولم یستطع اقناعه . یبدوا أن الرسائل السریه التي کان یرسلها امیر الی نوال لم یراها احد سواهم ؛ حتی زوجة امیر واهل نوال لم یکونا علی علم بتلک الاتصالات السریه علی أمل ان یجتمعاً مرة اخری .
بعد ان شرح والد نوال الموضوع لزوجته وکیف رفض عرض امیر ثم وبخه  وسوف یزوج ابنته لابن عمها زید .. 
احرقت نوال نفسها . بعد یومین توفت بالمستشفی و تم تدوین اقوال اهلها بأنها اثناء کوي وغسل ملابس اخوتها بالبنزین وما الی ذلک احدثت هذه الکارثة وتسبب في اشتعال النیران بجسد ابنتهم .. 
وهکذا طویت صفحة نوال  الجمیلة ذات الشعر الاشقر بسبب کره أم امیر لها وهي تبحث عن الجاه والمرکز وسط العوائل الغنیة وکذلک بسبب قلة وعي وادراک أمیر وعدم تمسکه بقوة بنوال وتسرع والدي نوال برفض امیر من جهة اخری عندما علموا بآنه متزوج ؛ وهم لایعلمون أن العلاقة الازلیه کانت مستمرة بینهم رغم زواجه من هذه الغنیة التي لاتعلم لحد الساعة بقصة حب زوجها لحبیبته الاولیه وهي تتفاخر أمام صدیقاتها بأن زوجها لاعب مشهور لاینظر حتی للعصفور جراء تمسکه وحبه لها .. ... ...
انها من القصص الحقیقیة ..
بالتاکید سنتعاطف کلنا مع نوال  وسؤالي هل سنمنع اولادنا وبناتنا ان یبحثوا عن من یحبون بصدق ؟؟ أم نقول شیئاً ونفعل شیئاً آخر بحجة الاعراف ثم التقالید والعادات ووووو وندوس علی مشاعر الصادقین . الیس کذلک ؟ 


...........
 اسعدتم مساءا ً



























































Reacties

جمعه مبارکه قبل تحریر فلسطین ... فاضل شناشیل 
حسیت البارحه اشویه تعبان ونمت واشوفلک بالحلم . دا اروح  للمستشفی واشتریت بطلین دم من هذول اللي بسوک الهرج لاشغل عندهم ولا مشغله عطاله بطاله . شیسوون خطیه من ظیمهم ما یگدرون یشتغلون .. وبیهم متعلمین علی الشرب بس ایحب ایصیر چم فلس عنده ویشتري بطل عرک ویاکله فد شیشیین معلاک .. خطیه هذول الناس ینکسر گلبي علیهم .. 
وکانه آني بوکت هذول الناس بجیوبهم  فلوس ملیانه ملي والزنگین مایهتم بالفقیر والفرهود یشتغل من جدید . الموظفین ما یشتغلون بما یرضي ربهم رغم رواتبهم ایحبون الرشاوي والمعلمات ما ینطون دروس زینه للتلامیذ همهن بس الذهب والمکیاج واشوکت ایفلتن من الدوام تلگیهن مثلي مکرشات خاشات بالعبایات مدري جبة الشیخ . خو الدفانه بعد لاتسولف علیهم ایشیلون هالمیت وایزحفون بهالمیت علمود ایبیعون ربع متر گاع للمیت الجدید والاولاد تلگیهم یترکون مدارسهم ویفترون بالشوارع بحجة ماکو معیل لهم ویشتغلون واصحاب المحلات یتجاوزون علی الرصیف من یخلون بضاعتهم ابکیفهم یرشون ابو البلدیه وابو البلدیه یغض النظر بعد ما یقبض چم فلس . والمدیر ایدز علیه وایکول اشلون تاخذ رشوه ؟ وهو ماخذ شغلتین مقاولات من الحکومه تبلیط شارع بشویه زفت مثل صخام وجهه . والمدیر عنده اربع عقارات ماخذهن خاوه من الناس . والکهاوي جایبین کراسیهم بنص الشارع ما تگدر حرمه لو بنت اتفوت بالشارع والکل ایباوعون علیها ! اتگول ما شایفین نسوان ؟! والشیوخ والملالي والساده تلکیهم کلهم بالجوامع ایصیحون ویل لتارک الصلاة وتلکی کلهم رایحین للجامع والشارع فارغ یوم الجمعه بس آني هنا گاعد اشرب لانه الایة ( ویل للشاربین ) نزلت علي آني بس . ایییه ..
وإجاني رعد اللي گبل سنه چان یگعد هنانه عاقل ویشرب ویانه راسا ایجیب جیش خاص مهمته ایکسرون البطل علِی راسي وایصیحون یاکافر یا منحل یا فاسق المجتمع کله خرب من وراک . اییه من وراک هیچي صار بالمجتمع ! مو مهم فشخة راسي بس ابو المحل خطیه شنو ذنبه ؟ ابو المحل ینکسر گلبه علي ایخابر الاسعاف وراها بساعتین یجي الاسعاف ایکول لا ماکو شي چان اتودوه بالتکسي علویش مکبرین الموضوع ؟ خطیه ابو المحل بعد ماکسروا محله شال خمس دنانیر ونطاه لابو الاسعاف رشوه لانه زعل علی شغله ماتسوه ولو مو عیب چان جاب عشیرته وسوو فصل ویاه . بس همزین فضت . اجاني ولد ازغیر یدفع عربانه کال عمو اودیک للمستشفی کلت ای عمو . گال الکروه دینارین ؟ گلت عربانتک مایسوا نص دینار شنو دینارین ؟ گال اترید اترید مترید انزل ! گلت حتی الطفل شلتو من عنده الانسانیه والرحمه ؟ وین مدارس گبل وین معلمین گبل ؟ وین المعلم شمعون المسیحي ایجیب ویاه نوتات جدیده للموسیقی وین استاذ ابراهیم الیهودي من چان یخش للدرس وایظل ساکت ربع ساعه حتی ایعلمنا علی الهدوء ؟ وین استاذ حسن من چان یشرح الدرس وعیونه علی اضافرنا نظیفه لو وسخه وایطلع من جیبه المکراضه ویگعد ایقلم اضافر ایدي ؟ وین المعلم فایق الکوردي قاطه و رباطه وهندامه الحلو ماعنده لحیه من چان یشرح الدین ؟ وین المعلم متي جابلنا فد یوم بیجاما للصف ولبسناه کال هاي للنوم بالبیت لانه خفیف ومریح ما تتظایکون من اتنامون . گلت استاذ والدشداشه ؟ کال هاي لبس اهل البدو مو لبس اهل الحضر . واشلون چان ابو اسماعیل جارنا جاب ماعون هریسه وکال هاي نذر ولابس قاطه القهوائي الجدید وام قدوري امسویه زردة النبي جابتلنا ماعونین گالت ادري جاییکم خطار وچانت لابسه ثوب ازرک مشتریتها من الاوروزدي باک . وشفت بهالحلم دا اشتري سیاره من مکان ایسموها معارض السیارات ضحکوا علي باعولي سیاره طلع نص اغراضها مو اصلیه . گلت بهالحلم لیش وین وکلاء شارع الرشید کلمتهم کلمه ثقه وضمان وامان ببیع السیارات ؟ المهم اللي باع لي السیاره شفت عنده لحیه وسبحه ویحچي یواش علی اساس ایمام چان طلع کلاوچي .
 ویاهو اللي بالشارع ارید اشکیله محد ایرد کلهم امندنجین روسهم بیدهم فد شي مثل الرادیون الزغیر ابکد باکیت الجکایر ایسموه موبایل ملتهین . ما ادري شنو هو هذا چان ؟ 
 وثاني الیوم الصبح اجاني واحد کال جمعه مبارکه رحت لسوک الغزل باگو مني الجزدان بعد ما اشتریت طیر ارفلي صاحبه شایل سچینه وکال اترجعه لو اشک بطنک هذا طیري ؟ یلا .. بخت . المهم رجعت الطیر وگلت له جمعه مبارکه .گللي هو وجههک وجه برکه ؟ . نشال طیور ایسولف ببرکات الجمعه .! . المهم رحت اني ومرتي لمستشفی الولاده اتلگونا السسترات بالرشاوي والله شنو حلیمه جابت ولد .!! وماخلوا افلوس ابجیبنا رجعنا بالامانه للبیت . وفاتت من یمي مظاهرات ضد اللاستعمار والامبریاله واني بالامانه شلت اصابعي لیفوک علی اساس علامه النصر . شافني شرطي وچان ایوگف الامانه ونزلني رزالات و راشدیات گال جیب دینارین یلا اهدک ! کلت دا احيي الفلسطینیین باشارة النصر . کال لا انت من الرجعیه . انطیته ساعتي یلا هدني کلها من ورا فلسطین خسرت الساعه ؛ هسه آني شعلیه بفلسطین ؟ 
من گعدت الصبح حرت بهالحلم  دا اسولف لمرتي گتلها شفت حلم واني کاعد بالبار من الصبح دا اشرب کلاص بیره .....
کالت حلمک هذا ایخوف .لیش شلت اصبعک لیفوک ؟ 
گلت علامة النصر غیر ؟ . 
گالت هاي سوالفک متجوز منها وکلها  اتصیر ورا سنة الفین . باچر عکبه ولدنا یکبرون ویشتغلون یم الفلسطیننین وایکولولهم یعطیک العافیه وما ینطوهم فلوس تعبهم .شعلیک بفلسطین ؟ من هسه لم غراضک واطلع للخارج هذا الحلم مرعب . کتلها ایجوز اني میت منا للالفین . کالت من هسه والی ورا الالفین یومیه تموت میت مره الاحسن انلم غراضنا ونطلع . 
رحت الصبح للبار یمنا براس الشارع بالسعدون وگلت للمصور الله یخلیک  بلکت اخر صوره تاخذ لي ؟ کال خفف شعر راسک اشویه ؟ گلت بابا صدک تحچي هذا مودیل ابو الزلوف احلی مودیل . معلیک طک صوره وهاک میة فلس وروح ... وناظم الغزالي ایغني قفي و دعینا . .....

 _

Reacties

بغدادیات .. هطریه باللبن وسطریه بالتمن .... فاضل شناشیل 
_ فدوه یوم شوفیلي چاره ؟
_ چارتیش یا ستار ؟ الفار لعب ابعبي ! خیرچ ؟
_ رجلي إیخش بدرابین اتخوف کلش !
_ تقصدین دربونة عکد الطنطل ؟ لو سبع درابین لو عکد النمله .
_ لا یوم ؛ مو درابین المحله .
_ لعد ؟ بس لا ایخش ببیوت الجوارین ؟
_ علواه یوم ؛ چان رحت وزفتیه هناک .
_ ولچ خوفتیني یا زواغیر ایخش رجلچ ؟
_ صفحات الفیسبوک وایگول هاي صفحات الفرنسیین ؛ مدري یصدک پچذب ؟
_ جیبي اذاناتچ وسمعیني زین .
_ ای یوم گولي .
الیوم من یرجع اتسوین تمن لرجلچ
_ تمن لویش ؟ یوم ؟
_ التمن بیه ماده اتنعس الرجال ویا التمن اتسوین سطل لبن .
_ لبن لویش ؟
_ اللبن یخدر تخدیر راساً یتمدد رجلچ واینام . 
_ وایظل اینام النهار کله ؟
_من یصحی سویله استکان چاي واشویه لبن ویاه یبقی متخدر .
_ شنو ابقیه النهار کله نایم ؟
_ وچ ثوله ؟ مو من ایصحصح یروح رکض علی الفیسبوک وینهجم بیت اللي خلفوچ .
_ ثاني یوم شسوي ؟
_ دولمه وکثري الحشوه تمن ومو تنسین سطله اللبن ویاه .
_ بلکت عجبه اسوي له کبه ؟
 _ انشاء الله ترحین واتجیبین برغل ؟ لا . عجني التمن زین وحشي بیهن اشویه لحم ؛ اشویه مو هوایه وکرفسات وبهارات .
_ اذا عجبه سمچ لو دجاج ؟
_ خلي ایعجبه . التمن ویا الدجاج طیب والسمچ علی التمن بعد اطیب .
_ یوم اخاف ایمل من التمن ؟
 ما صار شي جیبي صبغة اللوزنیه و لوني التمن الیوم تمن اصفر وباچر تمن احمر ووراها تمن ابیض . سطریه بالتمن . یوم شیخ محشي بالتمن ودولمه بالتمن ووبریاني بالتمن راساً کولیله هذا تمن بسمکي ابو الریحه ؛ سطریه بالحچي .
_ انتي هماتین هیجي چنتي إتسوین بابویه ؟ 

_ من چان یاخذنا سفرات بس یاکل یتمدد وینام جوا الشجره .


 

_ وانتي ابد ما صار عندچ کرش ؟ 
_ ولچ جنا انحافظ علی رشاقتنا ؛ حتی بالمدرسه .
_ علی رایچ راح یبقی امگابلني ؟ 
_ خبره عمر ویا ابوچ . متشوفین اشلون مکرش ومدهدر بالگوه یتحرک .
_ اذا گال کرشت من وراچ ؟
_ گولیله رئیس الجمهوریه مکرش ورئیس الوزراء مکرش انت هیبه وعنوان ومعلیچ .
_ اخاف رجلي میکرش ؟
_ گبل ما یتغذی حضري له الدشداشه وخلي ینزع البنطرون من یتزقنب .
_ علویش ینزع البنطرون ؟
 _ أها .. علمود یاخذ راحته من یتزقنب ویتمدد کرشه زاید ومن یرید ایگوم گومي گبله ناوشیه طاسه ورا طاسه لبن . ویا نفسچ گولي اذا ما نسیت اسم امک حلیمه ... وهو راح ینسی نفسه وینسی الفرنسیات .
_ الفرنسیات لویش یوم ؟
_ الفرنسیین کل یوم واحد ویا وحده والخیانه عادي یمهم . ومن یاکلون اکل ؛  النسوان بیهن ایشدن شریط احمر علی بطنهن من ایشبعن راسا الشریط ایتنک . عاد راسا یبطلن اکل . 
_ الفرنسیات حلوات یوم ؟
_ من حلحلت روحچ ؛ خلي بالچ یم رجلچ من ورا بنات الفیسبوک . دیري بالج مو ایناوشچ لگمه وتاکلیها ؟ بالچذب حرکي شفایفچ وحلگچ ؛ ترا من ایشوف صار عندچ کرش . اویلي ویا سواد لیلي من وراچ . هذاک الوکت انعل صفحة ابو اللي خلفچ . افتهمتي ؟ ..

........
 واحدة من الوصایا العشرة للأم ( الله یحفظها ) ...












































Reacties

هذا أکوش شاب گاعد إباب الحوش وفاتت من یمه حبیبته الاولیه ؛ هي و زوجها وابنها ؛ هو ظل ایباوع علیها ویجسر حسرات وصار فتره ما شایفها ... الله یا هل الوکت ..
دخلوا لبیت اهلها ؛ وره اشویه طلع الولد ابنها یلعب بالدربونه ؛ صاح له تعال تعال عمو ؟ 
_ شسمک عمو ؟ 
_ اسمي فضولي .
_ الله علی اسمي .. !
حظنه وباسه وطلع من جیبه الفین دینار ونطاها لفضولي وگال 
_ اذا امک سئلت امنین لک هالفلوس ؟ گول عمي نطاني ایاه اللي گاعد بالباب .
و گال ابوذیه .
إظل بهمومي اطویلک والف لک 
وإظل للدوم یحبیب ولف لک 
یفضولي هذا الف لامک والف لک .
ثمن نسمة هواها المر علیه ...

........
اذا شفتوا فلوس بجیبوب اولادکم مشوها  . ترا الجو ربیع وخلو روحکم ریاضیه ...






Reacties

اغلب الدول الاوروبیه الان ملوکهم ورؤسائهم ماکو صورهم علی الیورو بس جسر بمعناه الواضح تواصل کل دول الاتحاد وکذلک بالصفحه الورقیه الثانیه بوابات للاثار بمعنی کل الابواب مفتوحه مع بعضها .. ونتمنی ایصیر عدنا مثل هالنماذج ویصدر من البنک المرکژي الفلس والدرهم والربع دینار والعشر فلوس والمیة فلس واعتقد لو یصدر البنک المرکزي هیچي عملات نقدیه معدنیه وعلیها اثار العراق ورموزها القدیمه افضل من صور الجوامع والایات الدینیه وصور الرؤساء حتی نرفع الجدل الدیني والسیاسي ویرجع البلد متحضر ومتقدم من جمیع النواحي .. اعتقد هذه النماذج عراقیة خالصه وللجمیع .. شتکولون لو یکون العمله المعدنیه حمورابي هو الدینار ؟ وسرجون الاکدي النص دینار ؟ اذا عندکم اضافات ممکن نسمعها ... شنو رایکم ؟

Reacties

مسیر سیارة الزعیم عبد الکریم قاسم 
 یمر الزعیم یمناطق مختلفه من بغداد عندما یخرج من بیته بالعلویه ابتداءاً من شارع النضال حتی ساحة الطیران ثم المرور بشارع الشیخ عمر ثم باب الشیخ والدخول لشارع السیاع 1961 ... الیکم الصوره الاولی عند منطقه الشیخ رفیع بباب الشیخ قرب الغزالي والمؤشره بالنجمه الحمراء حیث اوقفه الناس واغلبهم من الفیترچیه والدوشمچیه والتکنچیه من اهل المحله بفضوه عرب والتسابیل والارمن ( الوایرمنیه )وبالصوره اشجار مقبرة الغزالي والکراج المقابل لایزال موجوداً ؛ ومن ثم الصوره الثانیه عند منطقة ( الچول ) قرب الغزالي حیث  تهدمت المنطقه من اجل شق شارع الکیلاني الجدید والبنایه المؤشره تحت بالسهم الاخضر لایزال موجودا حیث خلفه بانزینخانه باب الشیخ . ومطعم الربیعي وتوقف الزعیم هنا عدة مرات بسبب تجمهر المواطنین والسلام علیه وتعلق بعض الصبیه خلف السیاره .واغلبهم من عمال البناء والاسطوات بالبناء حیث یتعاملون مع اصحاب خانات الخشب الموجوده بالصوره للتعامل مع مواد البناء وهم اغلبهم من اسطوات بغداد یتجمعون هنا . واکمل الزعیم مسیرته نحو منطقه النهضة التي کان یحلم ان یکون اعلی برج بالشرق الاوسط هناک بالنهضة لکن قصر عمر الثوره لم یدع مجال للشروع ب المشروع و واصلت السیارة المسیر بالشیخ عمر وقرب مطعم الحاتي لیلتف بشارع السباع وهناک اوقفته الجماهیر واغلبهم عمال الحدید والخشب واغلبهم من الاکراد الفیلیین وهم یلوحون له بالسلام والتحیه والصوره المؤشرة بالدائره الزرقاء ....


اکمل الزعیم مسیره نحو شارع الکفاح ( شارع غازي سابقاً )  ومن ثم ساحة قمبر علي والدخول لشارع المهدي حیث مسقط راسه هناک ومن ثم الدخول لتقاطع شارع الجمهوریه ( شارع الملکه عالیه سابقاً ) والرشید وتکملة الطریق نحو جامع الحیدرخانه مرورا بوزارة الدفاع حیث مقر عمله ..

 اسعدتم مساءاً ....


Reacties
Laatste tweets
تراثيات
بغداديات
عدد المشاهدات
free counters
بغداديات